भांगरभूंय | प्रतिनिधी
पुस्तकांनी व्हडली शक्त आसता. मात बऱ्याच वाचप्यांक तें खबर नासता. तशें पळोवंक गेल्यार पुस्तक हो फक्त खूब पानांचो एक संग्रह. पूण ह्या पानांनी आमची सगली जीण बदलपाची शक्य आसता. पुस्तक म्हणल्यार गिन्यानाचें भांडार. आमी जे गजालींचो विचार करतात, त्यो सगल्यो आमकां पुस्तकांनी वाचपाक मेळटात, तातूंत आमच्या सगल्या प्रस्नांच्यो जापो आसतात. पुस्तक केन्नाच आमकां चुकीचें मार्गदर्शन करीना. तें आमचे कडेन फट उलयतना. तें गुरु सारकें. आमचें सदांच हित पळयता. तेन्नाच बारीकसाणेन योग्य पुस्तकाची निवड करून ते वाचूंक जाय. वाचून मनन, चिंतन करपाक जाय.
संवसारांत बरींच पुस्तकां आसात. लागीं लागीं सगल्या विशयांचीं. गरज आसा ती वाचपाची. दरेकल्यान म्हयन्याक एक तरी पुस्तक वाचपाक जाय. पुस्तकां आमकां फक्त गिन्यान दिना, तर वाजेवणो वेळ आनंदी, खोशी करपाची तांक तातूंत आसा. मनोरंजना वांगडाच ज्ञान, नवी म्हायती दिवपी पुस्तकां आसात. आपलें व्यक्तीमत्व तीं गिरेस्त करतात.
पुस्तकांची आमचे जिणेंत म्हत्वाची भुमिका आसता. तें वाचपाचे खूब फायदे आसात. नेमान पुस्तकां वाचल्यार आपलो शब्दसंग्रह वाडटा. लेखक वा जे कोण बरोवपाक सोदतात, पत्रकारिता करपाक सोदतात, तांणी चुकनासतना पुस्तकां, दिसाळ्यांतले लेख वाचपाक जाय. आपजीण वाचल्यार आमचें व्यक्तीमत्व सुदारता. कसलोय प्रसंग आयल्यार आमकां भंय दिसना. एक प्रकारचो आत्मविस्वास येता. पुस्तकांतल्यान मेळिल्लें ज्ञान जिवितांत केन्ना ना केन्ना उपेगी पडटाच. येशस्वी लोकांची आपजीण वाचल्यार आमकां प्रेरणा मेळटा. तांणी कसले परिस्थितींतल्यान येश जोडलें तें कळटा. आमकां तशें करपाची उर्बा हें वाचन दिता. पुस्तकांतलें ज्ञान खंय वचना, तें एके पिळगे कडल्यान दुसरे पिळगे कडेन वता. ते खातीर वाचीत रावात.
पुस्तकाचे खूब फायदे आसात. तातूंत आमचो फुडार घडोवपाची शक्त आसा. दरेका येशस्वी मनशाक पुस्तक वाचपाची आवड आशिल्ली. तेन्ना सगल्यांनी पुस्तक वाचपाची संवय लावन घेवची. ताचो केन्ना ना केन्ना तरी फायदो जातलोच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
