भांगरभूंय | प्रतिनिधी
वास्को: वेर्ण्यां बुधवारा मध्यान रातीं देड वरांच्या सुमाराक जाल्ल्या अपघातांत विठोबा उर्फ सुरज म्हाळकर (22) ह्या तरणाट्याक मरण आयलें. जाल्यार दुचाकीचालक स्वप्नील सोलेकर (23) हो किरकोळ जखमी जालो. ह्या प्रकरणांत वेर्णें पुलिसांनी पंचनामो केला.
म्हाळकर आनी सोलेकर हे मूळ रामनगर कारवारचे आसात. ते वेर्णें उद्देगीक वसणुकेंत एके कंपनींत कामाक आशिल्ल्यान कुभोर्डा वेर्णें हांगा रावतात.
बुधवारा मध्यान रातीं काम सुटले उपरांत ते दुचाकीन आपल्या रुमा कडेन वताले. ह्या वेळार सोलेकर हो दुचाकी चलयतालो. जाल्यार म्हाळकर हो फाटल्यान बशिल्लो. ते कुभोर्डा हांगा पावले तेन्ना सोलेकर हाचें दुचाकी वयलें नियंत्रण सुटिल्ल्यान ते अपघातांत सांपडले. ह्या अपघातांत म्हाळकर हो गंभीर जाल्ल्यान ताका उपचारा खातीर हॉस्पिटलांत व्हरता आसतना वाटेरूच मरण आयलें.
ह्या प्रकरणांत वेर्णे पुलीस स्टेशनाचे उपनिरिक्षक संकेत तळेकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
