भांगरभूंय | प्रतिनिधी
सुदिन ढवळीकारः हॅल्मेट, घडयाळी वरवीं कळटली विद्युतभारीत सरी
फोंडें: वीज खात्यांतल्या कर्मचाऱ्यांचे अपघात आडावपा खातीर नव्या तंत्रज्ञानाचो वापर करतले. विजेच्या शॉका पासून राखण करचे खातीर दरेका कर्मचाऱ्याक बेगिनूच तंत्रज्ञानाचो वापर करतले. हॅल्मेट आनी घड्याळी वरवीं विद्युतभारीत सरयेची म्हायती मेळटली. ते खातीर गोंय अभियांत्रिकी म्हाविद्यालयाची मजत घेतले. ह्या तंत्रज्ञाना वरवीं अपघात नियंत्रणांत येतले, अशें वीज मंत्री सुदिन ढवळीकार हांणी सांगलें.
फोंड्यां वीज खात्याच्या कर्मचारी संघटणेच्या भांगरा महोत्सवी वर्सा निमतान आयोजीत केल्ले कार्यावळींत मंत्री ढवळीकार उलयताले. ह्या वेळार माचयेर कामगार फुडारी ख्रिस्तोफर फोन्सेका, राजू मंगेशकार, प्रसन्ना उत्तगी, अॅड. सुहास नायक, कार्यकारी अभियंता सुदन कुंकळयेकार, केतन भाटीकार आनी हेर मानेस्त हाजीर आशिल्ले.
वीज खात्यांत दोन वर्सांत साडेतीन हजार कोटी रुपयांचीं उदरगतीचीं कामां करून गिरायकांक बरी सुविधा उपलब्ध करून दिवपाचो यत्न केला. तशेंच हेर राज्यां परस गोंयांतल्या गिरायकांक सवाय दरान वीज उपलब्ध करून दितात. वीज कर्मचाऱ्यांचे सुरक्षे खातीर लागपी साहित्य उपलब्ध करून दिलां. एकादो कर्मचारी वायट मार्गान गेलो जाल्यार ताची समजूत काडून ताका उजू मार्गार हाडपाचो यत्न करतात, अशें मंत्री ढवळीकार हांणी सांगलें.
राजकी लोक सरकारी खात्यांत हस्तक्षेप करून राजकी लाव घेवपाचो यत्न करतात. ताका लागून कर्मचाऱ्यांक भौशीक मळ तिगोवन दवरचे खातीर यत्न करपाक जाय. तशेंच वीज चोरी आडावपा खातीर कर्मचाऱ्यांनी खात्याच्या वरिश्ठ अधिकाऱ्यांक म्हायती दिवप गरजेचें आसा, अशें कामगार फुडारी ख्रिस्तोफर फोन्सेका हांणी सांगलें.ह्या वेळार राजू मंगेशकार, प्रस्न्ना उत्तगी आनी कार्यकारकी अभियंता सुदन कुंकळ्येकार हांणी आपले विचार मांडले. मानेस्तां हस्तुकीं कामगार प्रतिनिधींचो खास सत्कार केलो. तातूंत जॉन रोड्रीग्ज, महादेव रेडकार, तुळशीदास नायक, अफेक्स मोंतेरो, नाना पालकार, जोजेफ फर्नांडीस आनी कांय म्हयन्यां आदीं संवसारांक अंतरिल्ले वियन वेर्णेंकार हांचो मरणा उपरांत सत्कार तांचे घरकान्नीन स्विकरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
