विष्णू वाघ हांचें साहित्य चोरपाचो यत्न

भांगरभूंय | प्रतिनिधी

अरुणा वाघ हांचो आरोपः साहित्य सगळ्यांचेंच, पूण परवानगी तितलीच गरजेची

भांगरभूंय । प्रतिनिधी

पणजीः साहित्यीक सर्गेस्त विष्णू वाघ हांचें अप्रकाशीत साहित्याच्यो हातबरपावळी परवानगे बगर प्रदर्शनांत मांडल्यो. हे विशीं जाब विचारल्यार धक्काबुक्की केली, असो आरोप विष्णू वाघ हांची घरकान्न अरुणा वाघ हांणी कोंकण मराठी परिशदेचे अध्यक्ष सुदेश आर्लेकार हांचेर केलो. सोमारा तांणी हे संबंदांत पत्रकार परिशद घेतिल्ली.

आर्लेकार हांणी 24 जुलयाक संपर्क करून विष्णू वाघ हांकां आर्गां ओंपपा संबंदीचे कार्यावळी विशीं चर्चा केली. ते उपरांत तांणी साहित्या विशीं चवकशी केली. आपणे ताका विष्णू वाघ प्रतिश्ठाना वतीन काम पळोवपी निलेश बुगडे, देविदास आमोणकार आनी शिवराज पाटील हांचे कडेन संपर्क करपाक सांगलें. पूण ते उपरांत अशे तरेचो परिसंवाद जातलो हे विशीं आपल्याक काळखांत दवरलीं, अशें अरुणा हांणी सांगलें.

विष्णू हांचें साहित्य सगळ्यां खातीर आसा. हेच खातीर ज्यो संस्था तांचीं नाटकां करपा खातीर परवानगी मागतात तांकां आमी ती दितात. तांचीं अप्रकाशीत साहित्याचीं पुस्तकां दर वर्साक दोन हे प्रमाणांत उजवाडाक हाडपाचो आमचो विचार आसा. सध्या 6 पुस्तकां आमचे सृष्टी प्रकाशन संस्थे वतीन तयार आसात. आनीक 50 पुस्तकां उजवाडाक येवं येता इतलें साहित्य आसा. एकादो मनीस भायर पडले उपरांत ताच्या साहित्याचे अधिकार फुडल्या 50 वर्सां मेरेन तांच्या कुटुंबा कडेन उरतात. विष्णू हांचें कुटुंब म्हणल्यार तांची घरकान्न आनी पूत आसतना तांकां कार्यावळीची म्हायती दिवप ना आनी तांचें साहित्याचें प्रदर्शन मांडप बेकायदो आसा, अशें अरुणा हांणी सांगलें. विष्णू हांचें अप्रकाशीत साहित्य उजवाडाक हाडटले, अशी आर्लेकार हांणी घोशणा केली,  ती कोणाचे परवानगेन? संस्था चोर म्हूण ताका सगळेच वळखतात. आतां विष्णू हांचें साहित्य चोरपाक ते फुडें सरल्यात. तातूंत एकनाथ गोवेकार ह्या सरकारी कर्मचाऱ्याचो लेगीत आस्पाव आसा. सरकारान तांचेर खर कारवाय करून आर्लेकार हांकां ब्लॅकलिस्ट करचो अशी मागणी अरुणा हांणी केली. तशेंच आमचे परवानगे बगर विष्णू हांचें साहित्य कोणाकूच दिवचें न्हय, अशी सुचोवणी नाट्य संस्थांक केली. रामराव वाघ हांणी विष्णू वाघ हांकां फटोवन शाळा घेतली. तशेंच कसलीच कुवत नासतना ते प्राचार्य जाले, असोय तांणी आरोप केलो.

विरोध आसल्यार सांगपाचेः सुदेश आर्लेकार

आमी घेतिल्ले राष्ट्रीय परिसंवादांत रामराव वाघ हांकां वक्तो म्हूण आपयिल्ल्यानूच अरुणा वाघ तिडकल्यात. विष्णू वाघ हांचीं पुस्तकां आनी हातबरपावळी विक्रेक दवरूंक नाशिल्ल्यो. ताका लागून आमकां कसलोच अर्थीक फायदो जावंक ना. उरफाटे तांच्या हातबरपावळीच्यो फोटो कॉपी काडपांत आमकां खर्च आयलो. दोन म्हयन्यां आदीं परिसंवादाची कल्पना दिवन लेगीत अरुणा वाघ हांणी आमकां कसलेंच साहित्य उपलब्ध करून दिवंक ना. आमी हातबरपावळी गोंयच्या कलाकारां कडल्यान मेळयिल्ल्यो. त्यो थंयच्यान परवानगे बगर घेवन वचप चुकीचें. हातबरपावळीच्या प्रदर्शनाक विरोध आशिल्लो जाल्यार तशें सांगपाचें. विष्णू वाघ हांच्या साहित्याचेर परिसंवाद घेवपाक आमकां तांच्या कुटुंबाची परवानगी घेवपाची मातूय गरज ना, अशें सुदेश आर्लेकार हांणी उजवाडायिल्ल्या पत्रकांत म्हणलां.