भांगरभूंय | प्रतिनिधी
वाचनांन कितें दिलें तें चिंतल्यार जायते मुद्दे मुखार आयले. आनी खरेंच कळ्ळें वाचन सगळ्यांक कितलें म्हत्वाचें तें. वाचून मन खोल जाता. विकसीत जाता. वाचून कल्पनेक खूब व्याप्ती मेळटा..! म्हाका तरी तशें दिसता. वाचन मनाची भूक तृप्त करता आनी आमचो मूड सुदारता. सगळ्यां कडेन आमची वृत्ती खूब सकारात्मक जाता. पूण, विचारां खातीर आमी कितें वाचतात आनी तातूंतल्यान कितें घेतात हाचेरय दिका मेळटा. ताण उणो जाता. मन खुश करपाक वाचनाची म्हत्वाची भुमिका आसता, अशें म्हाका नक्कीच दिसता… नवी कुशळटाय विकसीत करपाक वाचन म्हजे खातीर सदांच म्हत्वाचें आशिल्लें. ताण काडून बरो जिवीत कशें जगचें तें शिकूं येतालें.
ल्हानपणा सावन म्हाका वाचपाची खूब आवड आशिल्ली. गोंयांतल्यो वेगवेगळ्यो लायब्ररी वाचून सहज सोंपयतालें. आवय- बापायच्या शिक्षणीक नोकरेक लागून वेगवेगळे गांव, थंयचे लोक, भोंवतणचो वाठार आनी तशेंच थंयचे वाचनालय वाचपाची संद मेळ्ळी. वाचनान म्हाका प्रेरीत करपाचें काम केलें. जिणेक सकारात्मक नदरेन पळोवपाची संवय तयार जाली. वाचपाचो मोग मन तशेंच आमच्या विचारांक दिका दिवपाचें काम करता. ताका लागून विचार करपाची तांक वाडटा.
वाचनांतल्यान आमचीं मतां अर्थपूर्ण रितीन मांडपाची तांकय वाडटा. आनी तातूंतल्यान मनांत समाधान जाता. समाजीक जिणेचें वेगवेगळे आंग, भासो, तांच्यो परंपरा… वाचनांतल्यान सगळें गिन्यान वाडटा. आनी विचार करपाची तांकय आपोआप विकसीत जाता. वाचपाक लागून कितें जाता. मन त्या वेळार सुखी जावन एक खिणाक विसरता आनी तें मन लेगीत सुखी करता. वाचन सदांच जिणेंतलें ध्येय साध्य करतना प्रोत्साहन दिवपाचें काम करता.
वाचन विचारांच्या विकासाक वाव दिता, मनांतल्या विचारांचो विस्तार करता आनी आमचे विचार कागदाचेर घालपाक प्रेरणा दिता अशें म्हाका दिसता. आनी जेन्ना आमच्या मनाचे विचार व्यक्त जातात तेन्ना सुखाची बुन्याद घालतात. इतलें मुक्त दिसता. इतलें बरें दिसता. मन ताजें जाता.
वेगवेगळ्या रुपांनी वाचल्यार विचारांची पातळी वाडटा अशें दिसता. भुरगेपणांत लेगीत राणी लक्ष्मीबाई, सावित्रीबाई फुले, महात्मा गांधी, लोकमान्य तिळक, नेहरू, शिवाजी – जिजाऊ सारकिल्ल्यो कथा हांव रूचीन वाचतालें. साने गुरुजीच्या श्यामची आई ह्या पुस्तकांतल्यान तशेंच साने गुरुजीन बरयल्ल्या एकंदर अद्भुत गजालींनी म्हाका प्रेरणा मेळ्ळी. वाचनांतल्यान मन एके तरेन तयार जाता. तातूंत रूचीन वेगवेगळीं कुशळटायो विकसीत करपाचें धाडस मेळटा. सिंदबादचे सफारी, अलीबाबा आनी चाळीस चोर, धाडसी चंदू, अरेबियन नाईट्स ह्या पुस्तकांनी कल्पनाशक्त वाडयली. मुक्त जिणेची कला शिकयली.
कादंबरी रुपान व्हड मनशांचीं, जाण्ट्यांचीं चरित्रां वाचतना मनाक वेगळें समाधान मेळ्ळें. छावा, प्रस्थान योगी, ऐलतटावर पैलतटावर आदी पुस्तकांनी खूब शिकयलें. कांय खूब सोबीत पुस्तकां मनाची, जिणे विशींची नदर घट करतात आनी समृद्ध करतात.. आनी आमी येसस्वी वाटेर आसात अशें दिसता. वाचनांतल्यान येसस्वीपणाचो धुंवर वयर सरपाक लागला. सुखी जिवीत जगपाची प्रेरणा सहज मेळटा अशें म्हाका दिसता.
विचारांक आकार दिवपाची तांक वाचनांत आसता. वाचन म्हळ्यार सगळ्या अर्थान वाचप. तातूंत पुस्तकां सावन दिसाळीं मेरेन सगळ्या तरांचें वाचन आसता. खंयच्याय मळार कितें चलता, संवसार खंय वता तें दर दिसा दिसाळ्यांतल्यान समजता. हालींच्या काळांत दूरदर्शन आनी हेर चॅनलांक लागून वाचपाची संवय उणी जाल्या. तरी लेगीत इंटरनॅटा वरवीं वाचपाची आवड वाडत आसा. खबरांपत्रां, पुस्तकां, ब्लॉग आदी इंटरनॅटाचेर वाचतात. छंद व्यक्तीमत्व निर्माण करता. कथा, कादंबरी, नाटकां, कविता वाचून मनरिजवण जाताच, पूण मनांत व्हड खोशी येता. एक सामान्य मनीस दिसाळीं वाचता, वाचता तें आयकता. खबरांपत्रांनी आमकां वेगवेगळ्या प्रकारची म्हायती मेळटा. गरजेवंत लोकांक ते रोजगार दितात. बेकारांक नोकरीची खबर दिवप. नव्या साहित्याची वळख करून दिवपाचें काम करता. खेळां मळार जावपी घडणुकांचो नियाळ घेतात. हेर कितलेशेच विशय घेवन दर दिसा दिसाळीं आमच्या मुखार येतात. सगळ्या तरांच्या बरपावळींनी मनाची भूक भागोवपाचें व्हडलें काम दिसपट्टीं दिसाळीं करतात. शारा सावन गांवगिऱ्या वाठारां मेरेन खबरांपत्रां मेळपाक लागल्यात. सगळ्या प्रकारांचो नियाळ घेवन तीं वाचप्यांची भूक भागयता. जायते जाण च्याय घेवन दिसाळें वाचून आपलो दीस सुरू करतात.
संवसारांतल्या वेगवेगळ्या वाठारांतल्या संशोधकांचे चरित्र वाचल्यार धर्म, देश, भास, चालीरिती हांचे नदरेन हे लोक सामके वेगळे आशिल्ले हें तुमकां दिसतलें. पूण ताची एक संवय समान आशिल्ली ती वाचन. म्हणजे मनशाक वाचनान आपलें गिन्यान अद्ययावत दवरूंक मेळटा आनी तातूंतल्यान प्रगतीचो मार्ग सोपो जाता.
– गौरी भालचंद्र
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
