भांगरभूंय | प्रतिनिधी
खबरां संस्था
जिलाँगः ऑस्ट्रेलियेंत टी-20 वर्ल्ड कप क्रिकेट सर्तींतले पात्रतायेचे पयले मॅचींत नामिबियान आशिया करंड जैतिवंत श्रीलंकेक 55 धांवड्यांनी हरोवन सगल्यांक धफको दिलो. दुबळो पंगडांत आसपाव केल्ल्या नामिबियान मेळयल्ल्या ह्या जैताक लागून हेर पंगडांत लेगीत तांचे कडेन खेळटना सादूर रावचें पडटलें अशें दिसून आयलें.
सायमंड्स स्टेडियम, जिलाँग हांका खेळय्लले हे मॅचीत नामिबियान बॉलींग आनी बॅटिंगेत बरी कामगिरी करून दाखयली. श्रीलंकन पंगडाचो तांच्या अती आत्मविस्वासान घात मारलो. नामिबिया आडची ही पयली मॅच तांणी सहजपणान घेतली आनी पयल्या बॉला पसून नकारात्मक पद्दतीचो खेळ केलो आनी तांकां लजेक घालपी हार खावची पडली.
पयलीं खेळटना नामिबियान श्रीलंके सामकार जैता खातीर 164 धांवड्याचें लक्ष्य दवोरलें. पयल्यो दोन विकेटी 16 धांवड्यांत पडले उपरांत लॉफी इटोन (20) आनी बार्ड (26) हांणी डाव साल्वार केलो. ते उपरांत कॅप्टन इरेस्मूस (20), जॅन फ्रायलींक (44) आनी स्मिथ हांणी पंगडाक 163 धांवड्यो करून दिल्यो. स्मिथान दोन चौके आनी दोन सक्यांनी 16 बॉलांत नाबाद 31 धांवड्यो केल्यो. फ्रायलींकान 28 बॉलांत 4 चौक्यांनी सगल्यांत चड 44 धांवड्यो केल्यो. श्रीलंकेच्या प्रमोद मदुशान 2 विकेटी घेतल्यो. थिकशान, चमिरा, करुणारथ आनी हसरंगान दरेकी एक विकेट घेतली.
श्रीलंका सहज जैत मेळतलो अशें दिसतालें, मात सगळेंच उरफाटें जालें. तांचो डाव 19 ओव्हरींत 108 धांवड्यांत सोपलो. हे हारीक लागून सुपर 12त सुवात मेळोवपा खातीर तांकां झगडचें पडटलें. श्रीलंकेचो बॅटींग पुरायपणान फ्लॉप थारली, कॅप्टन शनाकान सगल्यांत चड 29 धांवड्यो केल्यो. भानुका राजपक्षे (20) सोडल्यार हेर बॅट्समन फकत हजेरी लावन आयले. नामिबियाच्या डेव्हीड व्हिसा, बर्नार्ड शिकोंगो आनी फ्रिकलींक हाणी दरेकी दोन विकेटी घेतल्यो.
टी-20 वर्ल्ड कपांत श्रीलंका आनी नामिबिया एकमेका सामकार येवपाची ही दुसरी फावट आसा. हाचे पयलीं 2021 वर्सा जाल्ले मॅचींत श्रीलंकेन 7 विकेटींनी जैत मेळयल्लें. नामिबियाचो डाव तेन्ना 96 धांवड्यात सोपिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
