भांगरभूंय | प्रतिनिधी
फाटल्या सात दिसांत फक्त 5,897 लोकांनी घेतलो डोस
पणजी: गोंयांत भलायकी खात्या वतीन तिसरो बुस्टर डोस 15 जुलय सावन 18 ते 59 पिराये गटांतल्या लोकां खातीर फुकट सुरू केला. तरी लेगीत लोकांचो बुस्टर डोसाक बरो प्रतिसाद मेळना. 15 ते 21 जुलय ह्या सात दिसांत फक्त 5,897 लोकांनी हो डोस घेतला.
गोंयांत 18 ते 59 पिराये गटांतल्या लोकांनी आतां मेरेन 10 हजार 310 जाणांनी बुस्टर डोस घेतला. जाल्यार 60 वर्सां पिराये वयल्या वट्ट 74 हजार 185 लोकांनी बुस्टर डोस घेतला. 15 जुलय ते 30 सप्टेंबर अशे 75 दीस बुस्टर डोस मोहीम सुरू आसून गेांयांतल्या 40 विवीध भलायकी केंद्रांनी हो डोस दितात. पूण लोकांचो हाका जाय तसो प्रतिसाद मेळनाशिल्ल्यान भलायकी खात्याच्या अधिकाऱ्यां कडल्यान प्रचार आनी प्रसार सुरू आसा.
हाचे पयलीं बुस्टर डोस फक्त 60 वर्सां पिराये वयल्या लोकां खातीर तशेंच कोरोना झुजाऱ्यां खातीर तशेंच दुयेंती व्यक्ती खातीर आशिल्लो. जाल्यार हेर 18 ते 59 पिराये गटांतल्या लोकां खातीर पयशे भरून डोस घेवचो पडटालो. पूण आतां हो डोस फुकट केला. ताका लागून लोकांनी हो तिसरो डोस घेवपाचें आवाहन भलायकी खात्या वतीन केलां.
बुधवार आनी बिरेस्तार ह्या 24 वरांत वट्ट 89 नवे कोरोना सक्रीय दुयेंती सांपडले. एका दुयेंतीक कोरोनाक लागून मरण आयलें. आतां मेरेन वट्ट सक्रीय दुयेंतींची संख्या 697 जाल्या. जाल्यार बळींचो आंकडो 3 हजार 848 वयर गेला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
