भांगरभूंय | प्रतिनिधी
खबरां संस्था
इंग्ंलडः इंग्लिश प्रीमियर लीग फुटबॉल सर्तींतलो लिवरपूल फुटबॉल क्लब विकतो घेवपाचे सर्तींत भारताचो दुसरे गिरेस्त उद्देगपती आनी रिलायन्स इंडस्ट्रीजाचो धनी मुकेश अंबानी आसात अशी खबर द मिररान दिल्या. 38 हजार कोटी रुपयांचो बोली अंबानी हांणी लायल्या. हाचे पयलीं 2010 वर्सा व्हो क्लब विकतो घेवपाचो अंबानी हांणी यत्न केल्लो.
मिररान दिल्ले खबरे प्रमाण लिवरपूल एफसीचो धनी फॅनवे स्पोर्ट्स ग्रपान (एफएसजी) क्लब विकपाची तयारी सुरू केल्या. तांणी ते खातीर 4 बिलियन पावंड म्हणल्यार 38 हजार कोटी रुपयांचो मोल थारायलां. मुकेश अंबानी हांणी व्हो क्लब विकतो घेवपाची इत्सा उक्तायल्या अशें खबरेंत म्हणलां. अंबानी हांची संपत्ती 7.6 लाख कोटी रुपयांची आसा. ताकां खेळांत खूब इंटरेस्ट आसा. क्लब विकतो घेवपा खातीर जाय ती रक्कम ते दिवपाक शकतात. लिवरपूल विकतो घेवपा खातीरचे सर्तींत मध्य पूर्व आनी अमेरिकेतले कांय उद्देजक आसात अशी खबर आसा.
2010 वर्सा अंबानी हांणी सहारा इंडियाचे चॅरमन सुब्रत रॉय हांच्या वांगडा लिवरपूल विकतो घेवपाचो यत्न केल्लो. तेन्ना फॅनवे स्पोर्ट्स ग्रुपान लिवरपूर विकतो घेतिल्लो. आतां व्हो क्लब विकपाचें काम इन्व्हेन्समेंट बँकिंग कंपनी गोल्डमन सैक्स आनी फायनेंन्शियल सर्व्हिसेक कंपनी मॉर्गना स्टेनलीक काम दिलां. खबरे प्रमाण रिलायन्स लिवरपूल टीम मजबूत करपा खातीर लाखांनी डॉलरांची गुंतवणूक करपा खातीर तयार आसा. भारतांत क्रिकेट उपरांत फुटबॉल लोकप्रिय आसा.
इंडियन प्रीमियर लीग क्रिकेट सर्तींत खेळपी मुंबय इंडियन्स ही अंबानी हांची टीम आसा. तांणी 2008 वर्सा वर्ल्ड रिचेस्ट स्पोर्ट्स टीन ओनर अशें जाहीर केल्लें. रिलायन्स कंपनी कडेन तीन देशांत टी-20 टिमी आसात. तातूंत बीसीसीआयची आयपीएल, अमिरात क्रिकेट बोर्डाची यूएई टी-20 आनी क्रिकेट सावथ आफ्रिकाची टी-20 टिमीचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
