राष्ट्रीय सेवा येवजणेंतल्यान विद्यार्थ्यांचो सर्वांगीं विकास शक्यः दिलीप धारगळकार

कोरगांवच्या कमळेश्वर उच्च माध्यमीक विद्यालयांत राष्ट्रीय सेवा येवजणे विभागाचें उक्तावण करतना प्रा. दिलीप धारगळकार. कुशीक प्राचार्य जुही थळी, विठोबा बगळी, दीपश्री सोपटे, संस्कार बुडके, आसावरी शेट्ये आनी एलियट तोपी. (मकबूल माळगीमनी)

भांगरभूंय | प्रतिनिधी


कोरगांव ः राष्ट्रीय सेवा येवजण ही हेर सरकारी येवजणां सारकी येवजण न्हय. तातूंतल्यान विद्यार्थ्यांची सर्वांगीं उदरगत शक्य आसा अशें सेंट झेव्हियर उच्च माध्यमीक विद्यालयाचे अध्यापक दिलीप धारगळकार हांणी सांगलें.
कोरगांवच्या श्री कमलेश्वर उच्च माध्यमीक विद्यालयाच्या राष्ट्रीय सेवा येवजण विभागाचें उक्तावण करतकच मुखेल सोयरे ह्या नात्यान ते उलयताले.. ह्या वेळार माचयेर तांचे वांगडा श्री कमळेश्वर उच्च माध्यमीक विद्यालयाची प्राचार्य जुही थळी, राष्ट्रीय सेवा येवजण अधिकारी विठोबा बगळी, दीपश्री सोपटे, विद्यार्थी मुखेल संस्कार बुडके, विद्यार्थिनी मुखेल आसावरी शेट्ये, विद्यार्थी मंडळ मुखेल एलियट तोपो आदींची उपस्थिती आसली.
राष्ट्रीय सेवा येवजणे कडेन विद्यार्थ्यांनी स्कीम म्हणून पळोवची न्हय. ती विद्यार्थ्यांची ड्रीम जावची अशें सांगून प्रा. दिलीप धारगळकार हांणी राष्ट्रीय सेवा येवजणेचें स्वरूप आनी म्हत्व स्पश्ट केलें.
राष्ट्रीय सेवा येवजण ही हेर सरकारी येवजणां सारकी येवजण न्हय. तातूंतल्यान सर्वांगीण विकास शक्य आसा. विद्यार्थ्यांच्या व्यक्तीमत्वा वांगडा जिणेक उपेगी शिक्षण दिवपाची तांक आसा. आयज मनशा कडेन अत्याधुनीक साधनां आसलीं तरी मनशां मनशांक एकठांय हाडपाची यंत्रणा ना. राष्ट्रीय सेवा येवजणेंत ती ताकद निश्चितूच आसा. आमची अभिजात भारतीय संस्कृती सांबाळटना मनशाच्यो भावभावना ते वरवीं सांबाळप शक्य आसा अशें धारगळकार हांणी सांगलें.
विद्यार्थ्यांनी समाजीक बांदिलकी सांबाळटना राष्ट्रीय विचारांचीय जपणूक करपाक जाय. कश्टाचें मूल्य समजूंक जाय, सांबाळूंक जाय आनी मातयेचें म्हत्व जाणूकं जाय. राष्ट्र उबारणेच्या ह्या उपक्रमांत सहभागी जावंक जाय अशेंय तांणी सांगलें.
येवकार गितान कार्यावळीचो आरंब जालो. मल्लिका गावडे, सुहानी गावडे, पूजा परब, ऐश्वर्या हरमलकार, साची गावडे, सिया साळगांवकार, सिमरन कान्नाईक, प्रतिक्षा गावडे, सानिशा कोरगांवकार, रेखा अडेलकार हांणी सादर केल्ल्या येवकार गितान कार्यावळीक सुरवात जाली. तांकां निशा च्यारी (हार्मोनियम), गोपाळ कांबळी (तबला) ह्या विद्यार्थ्यांनी साथसंगत केली.
प्राचार्य जुही थळी हांणी येवकार दिलो आनी प्रास्तावीक केलें. संस्कार बुडके हांणी माचये वयल्या मानेस्तांची वळख करून दिली. एलियट तोपो, रेखा हळदणकार, सिया आगरवाडेकार, निशा च्यारी, सानिशा कोरगांवकार, सिया साळगांवकार हांणी माचये वयल्या मानेस्तांक फुलां भेटयलीं.
दीपश्री सोपटे हांणी फाटल्या वर्सांचो अहवाल सादर केलो. विद्यार्थिनींनी राष्ट्रीय सेवा येवजण गीत सादर केलें. मानेस्तांचे हस्तुकीं दिवली पेटयली आनी महात्मा गांधी आनी स्वामी विवेकानंद हांच्या फोट्याक हार घाले.
विठोबा बगळी हांणी विद्यार्थ्यांक राष्ट्रीय सेवा येवजणेचो सोपूत दिलो. प्राचार्या जुही थळी हांणी मुखेल सोयरे प्रा. दिलीप धारगळकार हांकां स्मरणचिन्न भेटयलें. अनिशा कुएल्हो हांणी कार्यावळीचें सुत्रसंचालन केलें. आसावरी शेट्ये हांणी उपकार मानले.


‘स्कीम न्हय, ड्रीम म्हणून पळयात’
राष्ट्रीय सेवा येवजणे कडेन स्कीम म्हणून पळयनाकात. ती दरेका विद्यार्थ्याची ड्रीम जावची. कारण राष्ट्रीय सेवा येवजण विद्यार्थ्यांचें व्यक्तीमत्व घडयता आनी एकजूट वाडयता. कश्टाचें मूल्य कशें सांबाळप हेंवूय ही येवजण शिकयता अशें सेंट झेव्हियर उच्च माध्यमीक विद्यालयाचे अध्यापक दिलीप धारगळकार हांणी सांगलें.