भांगरभूंय | प्रतिनिधी
पणजीः गोंयांत मान्सूनपूर्व पावसाचो सांवार चालूच आसा. वादळी वाऱ्या सयत पडिल्ल्या उटंगाराच्या पावसाक लागून रस्ते आनी घरांचें व्हड लुकसाण जालें. कांय कडेन घरांनी आनी दुकानांनी उदक भितर घुसलें. मजगतीं, मुख्यमंत्री प्रमोद सावंत हांणी आपत्ती वेवस्थापनान तयार रावचें म्हूण निर्देश दिल्यात. दुसरे वटेन गोंय वेधशाळेन आयज आनी फाल्यां ऑरेंज अलर्ट जारी केलां. नुस्तेमारांक दर्यांत वचूं नाका म्हूण शिटकावणीय दिल्या.
पणजेच्या उत्तर गोंय जिल्होधिकारी कार्यालया मुखार झाड पडून स दुचाकी वाहनांचें लुकसाण जालें. सोनारभाट रेयश मगूश हांगा झाड पडून श्री भूमिपुरुष देवळाचें लुकसाण जालें. मडगांव, रावणफोंड पुला लागसारचो रस्तो हुंवाराच्या भिरातीन बंद करून येरादारी घुंवडायली. म्हालवाडो-पैंगिणी हांगां इंदिरा आवास येवजणे खाला बांदिल्ल्या घराचेर झाड पडलें. घर पुराय काबार जालें. वास्को सड्यार पालसण कोसळपाची घडणूक घडली. ताका लागून कांय वेळ सड्यार फ्लायओव्हर वाठारांत येरादारीची कोंयडी जाल्लीं.
वेरें-बार्देश हांगां झाड आनी घराची राखणें वणत कोसळून दोन गाडयांचें लुकसाण जालें. पिळर्णाच्या उजो पालोवपी दळान परिस्थिती हाताळ्ळी. हडफड्यां झाड कोसळून एका घराचे लुकसाण जालां. कासारवर्णे- पेडण्यां वड पडिल्ल्यान रस्तो बंद जाल्लो. ह्या घडणुकेंत एका गाडयेचें लुकसाण जालां. उजो पालोवपी दळान रस्तो येरादारीक मेकळो केलो. तशेंच बागा, सुकुर, आजोशी हांगा झाडां पडून लुकसाण जालें.
कुडचड्यां नंदा तळ्याच्या बांदाची दारां उक्तीं केल्ल्यान बाणसाय शेतांत उदक भरून पिकांचें लुकसाण जालें.
बुधवारा सकाळीं 8.30 मेरेन राज्यांत सरासरी 5.51 इंच पावस पडला. ह्या वेळार पेडणें 8.16 इंच, म्हापश्यां 7.96 इंच, दाबोळी 7.48 इंच, केपें 6.89 इंच, पणजे 5.34 इंच पावसाची नोंद जाल्या. 1 मार्च ते 21 मे ह्या काळांत राज्यांत सरासरी 8.11 इंच पावस पडला. ह्या काळांत दाबोळी सगळ्यांत चड 11.48 इंच पावस पडला. जाल्यार मुरगांवां 10.51 इंच, केपें 10.32 इंच पावस पडला. खात्यान दिल्ले म्हायती प्रमाण हवामानांतल्या बदलाक लागून कर्नाटक आनी गोंयचे दर्यादेगेर अरबी दर्यांत चक्रीवादळाचें परिभ्रमण तयार जालां. फुडल्या 12 वरांत ताचें रुपांतर उण्या दाबाच्या पट्ट्यांत जावपाची शक्यताय आसा. हाका लागून राज्यांत पावसान सांवार घातला. फुडल्या 36 वरांत उण्या दाबाचो पट्टो गुजराताचे वटेन वचपाची शक्यताय आसा.
दोन दीस पडिल्ल्या व्हड पावसाक लागून राज्यांत चडांत चड तापमान उणें जालां. बुधवारा पणजेचें तापमान चडांत चड 27.4 अंश आनी उण्यांत उणें तापमान 24.6 अंश नोंद जालां. मुरगांवां चडांत चड तापमान 30.6 अंश आनी उण्यांत उणें तापमान 25.4 अंश सेल्सियस आशिल्लें. फुडल्या स दिसांत राज्यांत चडांत चड तापमान 29 ते 30 अंश आनी उण्यांत उणें 26 अंश मदीं उरपाची शक्यताय आसा. 22 ते 25 मे ह्या काळांत वाऱ्याचो वेग वराक 45 ते 65 किमी. आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
