भांगरभूंय | प्रतिनिधी
इंडीयन प्रिमीयर लिगेचे (आयपीएल) दुसरे क्वॉलिफायर मॅचींत राजस्थान रॉयल्सान रॉयल चॅलेंजर्स बंगळुरूक 7 विकेटींनी हारोवन फायनलींत सुवात मेळयली.
29 मेक जावपी फायनलींत तो हार्दिक पांड्याच्या फुडारपणाखाला खेळपी गुजरात टायटन्सा आड खेळटलो. राजस्थान रॉयल्स 14 वर्सांनी आयपीएलाचे फायनलींत पावलो. दुसरे वटेन बंगळुरूचें वस्तादपण जोडपाचें सपन परतून भंगलें.
पयलीं बॅटींग करतना रॉयल चॅलेंजर्स बंगळुरून निर्धारीत 20 ओव्हरींनी 8 विकेटी वगडावन 157 धांवड्यो केल्यो. राजस्थानान 158 धांवड्यांची मोख 18.1 ओव्हरींनी 3 विकेटी वगडावन मेळयली.
राजस्थानाच्या जोस बटलरान जबरदस्त बॅटींग केली. ताणें 66 बॉलांनी नाबाद 106 धांवड्यांची खेळी केली. अंदूंच्या हंगामांतलो ताचो हो चवथो शेंकडो थारलो. अशे तरेन ताणें विराट कोहलीच्या विक्रमा कडेन बरोबरी सादली. कोहलीन 2016तल्या हंगामांत चार शेंकडे मारिल्ले.
राजस्थान 2008 उपरांत पयले खेपे फायनलींत पावला. आयपीएलाच्या पयल्या हंगामांत शेन वॉर्नाच्या फुडारपणाखाला खेळपी राजस्थान फायनलींत पाविल्लो आनी वस्ताद लेगीत थारिल्लो.
दुसरे वटेन बंगळुरू 2009, 2011 आनी 2016च्या हंगामाचे फायनलींत पाविल्लो. पूण, दरेक खेपे ताका उप वस्तादपणाचेर समाधान मानचें पडलां.
धांवड्यांचो फाटलाव करपी राजस्थानान आक्रमक सुरवात केली. ओपनर यशस्वी जयस्वाल आनी जोस बटलर हाणें पांच ओव्हरींनीच पंगडाचो अर्द शेंकडो पुर्ण केलो. अखेरेक ही जोडी जोस हेझलवूडान फोडली. ताणें यशस्वीक वैयक्तीक 21 धांवड्यांचेर बाद केलो.
मजगतीं, बटलरान आपलें गियर बदलून 23 बॉलांनी अर्द शेंकडो पुर्ण केलो. ताणें मुखेली संजी सॅमसना वांगडा मेळून 10 ओव्हरींनी पंगडाचो शेंकडो पुर्ण केलो. हे जोडयेन दुसरे विकेटी खातीर 52 धांवड्यांची भागिदारी केली. ही जोडी जैत मेळोवन दिता अशें दिसता आसतना हसरंगान सॅमसनाक (23) बाद केलो. ते उपरांत बटलरान डावाची सगलीं सुत्रां आपल्या हातांत घेत पंगडाक जैताच्या लागसार व्हेलो. पूण, हेझलवूडान पडिक्कलाक (9) बाद करून राजस्थानाक तिसरो धपको दिलो.
मॅच जिखपाक 4 धांवड्यांची गरज आशिल्ली आनी बटलर 99 धांवड्यांचेर आशिल्लो. ताणें एक धांवडी घेत अंदूंच्या हंगामांतलो चवथो शेंकडो पुर्ण केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
