भांगरभूंय | प्रतिनिधी
-म्हापशें पुलिसांची कारवाय, दोगांक अटकम्हापशेंः ड्रग्स (काेकेन) तस्करी प्रकरणांत पुण्यांतल्यान गोंयांत आयिल्ल्या दोगां युगांडाच्या विद्यार्थ्यांक म्हापशें पुलिसांनी अटक करून तांचे कडल्यान 20.50 लाखांचो ड्रग्स जप्त केलो.
सेंतामू एल्वीस (29) आनी उमर लुक्वागो (27) अशी दुबावीत तरणाट्यांची नांवां अासात. दुबावीत आरोपी भारतांत विद्यार्थी व्हिसाचेर राबित्याक अाशिल्ले.
शुक्रारा 16 वेर रातीं उसरा म्हापशें पुलिसांनी ही कारवाय नव्या कदंब बस स्थानकाचेर केली. दुबावीत बस मार्गान पुण्यांतल्यान म्हापश्यां ड्रग्सची विक्री वेव्हार करपाक आयिल्ले. हे विशीं सुत्रां कडल्यान पुलिसांक म्हायती मेळ्ळे उपरांत पुलिसांनी ह्या आंतरराज्य बस स्थानकाचेर सापळो रचलो आनी ते प्रवासी बशींतल्यान सकयल देंवले उपरांत तांकां ताब्यांत घेतले.
तांची झडटी घेतली तेन्ना तांचे कडेन कोकेन सांपडले. हातूंत एल्वीस हाचे कडेन 103 ग्रॅम जाल्यार उमर लुक्वागो हाचे कडेन 102 ग्रॅम मेळून वट्ट 205 ग्रॅम वजनाचे कोकेन आशिल्ले. ह्या ड्रग्साचें मोल अांतरराष्ट्रीय बाजारांत 20 लाख 50 हजार रुपया आसा.
पुलीस अधिक्षक अक्षत कौशल, उपअधिक्षक संदेश चोडणकार आनी निरिक्षक निखील पालेकार हांच्या मार्गदर्शना खाला उपनिरिक्षक यशवंत मांद्रेंकार, बाबलो परब, अादित्य गाड, मंगेश पाळणी, हवालदार सुशांत नायक चोपडेंकार, कॉन्स्टेबल तुकाराम कांबळी, राजेश कांदोळकार, प्रकाश पोळेकार, साईदास पणजीकार, आनंद राठोड ह्या पंगडान ही कामगिरी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
