भांगरभूंय | प्रतिनिधी
वेतन राखीव निधी काबार; खर्च वाडला, पूण महसूल वाडी कडेन आडनदर
भांगरभूंय । प्रतिनिधी
म्हापशें: म्हापशेंची पालिका अर्थीक संकटांत सांपडल्या. कराच्या रुपांत जमा जावपी म्हयन्याचो महसूल फक्त कर्मचाऱ्यांच्या पगाराचेर सोंपता. ह्या पगाराचेर पालिकेन राखीव निधी (सेलरी रिजर्व्ह फंड) लेगीत वापरला. हे स्थितीचेर पालिका मंडळान योग्य उपाय काडलो ना जाल्यार पालिकेचेर व्हड संकट येतलें.
फाटल्या कांय वर्सां सावन म्हापशें पालिकेचो खर्च खूब वाडला. अशा वेळार पालिका मंडळान महसूल मेळोवपाचेर लक्ष दिवपाक जाय. पूण ते कडेन आडनदर केल्ल्यान योग्य तरेन कर वसुली जायना. थकबाकीचे वसुली कडेनूय फाट केल्या.
पालिका कर्मचाऱ्यांच्या म्हयन्याच्या पगाराची रक्कम सुमार एक कोटीच्या घरांत आसा. ताका लागून कर्मचाऱ्यांचो पगार दिवचे खातीर पालिके कडेन एक कोटी रुपया आसपाक जाय. सध्या महसुलांतल्यान हो आंकडो कसो बरो मेळयतात.
म्हयन्याक जो महसूल मेळटा, तो सगळो पालिका कर्मचाऱ्यांच्या पगारा खातीर खर्च जाता. खंयचेंय आपत्कालीन वा अर्थीक संकट आयलें जाल्यार ताका फुडो करपा खातीर हो कर्मचारी राखीव निधी फंड दवरतात. पूण हो फंड लेगीत पालिकेन वापरला. हो फंड वापरचे खातीर पालिका मंडळाक सरकाराचें म्हणल्यारूच पालिका संचालनालयाची परवानगी घेवची पडटा. तशेंच नेमा प्रमाण ह्या निधींतली जितली रक्कम काडटात ती थारयिल्ल्या वेळांत परतून जमा (रिकूप) करची पडटा. पूण फंडांतली काडिल्ली रक्कम जमा करूंक नाशिल्ल्यान हो फंड रितो जाला.
पालिका वाठारांत खूबशे बेकायदो वेवसाय चालू आसात. त्या वेवसायिकांक वेवसायीक परवानो ना. हो परवानो दिवचे खातीर आनी बेकायदो वेवसाय बंद करपाक पालिके कडल्यान फावोशीं पावलां उखलिनात. पालिके कडल्यान एकाद्याक वेवसाय परवानो घेवचो आसा जाल्यार पालिका कर्मचाऱ्यांक ‘खोशी’ केले बगर फायल फुडें वचना. पळोवणी नोटीस जारी जायना. तशेंच नगरसेवकाचीय मर्जी सांबाळची पडटा. एकादो मनीस कायद्याच्या मार्गान गेलो जाल्यार ताका कितलीशींच वर्सां ट्रेड लायसन मेळना. हाका लागून शारांत पालिकेचो परवानो घेनासतनाच वेवसाय सुरू करपाच्या प्रकाराक ओतो आयला.
पालिकेन ही प्रक्रिया सुटसुटीत आनी टायम बावंड केली जाल्यार शारांतले बेकायदो प्रकार आळाबंदा येतले आनी पालिकेचे तिजोरेंत महसूल जमा जातलो. ते भायर बाजारपेठ आनी हेर कायद्यान चलपी वेवसायिकां कडल्यान वेळार कर वसुली जायना. ताका लागून थकबाकीचो आंकडो वाडला. पालिका डिमांड नोटीस जारी करता. नोटीसो जारी करून लेगीत वसुलीची मात खबरूच आसना. पालिका मंडळ सध्या महसूल वाडोवपा कडेन लक्ष दिनासतना केंद्र आनी राज्य सरकाराच्या अनुदान निधी वरवीं उदरगत कामां चालीक लावपांत धन्यताय मानता. वेळारूच हो सेलरी रिजर्व्ह फंड पुननिर्मीत करपाची गरज आसा. पालिका मंडळ, पालिकाधिकारी, लेखा आनी कर विभाग हांचो समन्वय नाशिल्ल्यान पालिकेचेर हें अर्थीक संकट आयलां.
पगारा खातीर जावं येता आंदोलन…
सध्या मुरगांव, वाळपय आनी हेर कांय पालिका अर्थीक संकटांत आसात. ह्या पालिकांतल्या कर्मचाऱ्यांक वेळार पगारूय मेळना. ताका लागून कर्मचाऱ्यांक आंदोलनाचो मार्ग आपणावचो पडटा. वेळारूच हाचेर उपाय काडलो ना जाल्यार पगारा खातीर कर्मचाऱ्यांच्या आंदोलनाक म्हापशें पालिका मंडळाक फुडो करचो पडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.