भांगरभूंय | प्रतिनिधी
म्हादय प्रकल्पांक परवानो दिवपा विशीं, विर्डी धरणाच्या डीपीआराचेर जातलो निर्णय
पणजी ः कर्नाटका आड गोंयांन दाखल केल्ली अवमान याचिकेचेर सर्वोच्च न्यायालयांत सुनावणी जावपाची शक्यताय आसतनाच आतां 4 मार्चाक म्हादय प्रवाह समितीची बसका मुंबय जातली. म्हादय न्हंयचेर ल्हान प्रकल्प तशेंच पिवपाच्या उदका खातीर नियोजीत केल्ल्या प्रकल्पांक परवाने दिवपा संबंदी निर्णय जातलो. हाका लागून गोंय आनी कर्नाटका खातीर ही बसका म्हत्वाची आनी निर्णायक थारतली.
ही बसका 4 मार्च 2025 दिसा सकाळीं 11 वरांचेर मुंबय जातली. प्रवाह समितीचे सचीव अशोक कुमार हांणी पत्र धाडून बसका जातली अशें संबंदीतांक कळीत केलां. प्रवाह समितीच्यो आतां मेरेन तीन बसका जाल्यात. समितीची बसका मुंबय पयलेंच फावट जाता.
कळसा – भंडुरा प्रकल्पा वरवीं म्हादयचें उदक वळोवपाचो कर्नाटकाचो प्रस्ताव आसा. पिवपाच्या उदका खातीर हो प्रकल्प गरजेचो आसा असो कर्नाटकाचो दावो आसा. तशेंच गोंय सरकाराचोय म्हादय न्हंयचेर ल्हानसो प्रकल्प उबारपाचो प्रस्ताव आसा. ह्या प्रकल्पांक मान्यताय दिवपा विशीं बसकेंत चर्चा जातली. कळसा नाला प्रकल्पाची संयुक्त पळोवणी करची अशी मागणी गोंय सरकारान केल्या. गोंय सरकाराचे हे मागणेचेर बसकेंत निर्णय घेतले.
म्हादयच्या उदकाचेर विर्डी हांगा धरण बांदपाचो महाराष्ट्राचो प्रस्ताव आसा. ह्या प्रस्तावाच्या प्रकल्प आराखड्याचेर (डीपीआर) चर्चा जातली. विर्दी धरणाकय गोंय सरकारान विरोध केला. हाका लागून महाराष्ट्रा खातीरय ही बसका म्हत्वाची थारतली.
हाचे भायर प्रवाह समितीचें पर्वरी कार्यालय स्थापन करप, अधिकाऱ्यांची नेमणूक करप, निधी, संकेतथळ तयार करप अशा प्रशासकीय गजालींचेरूय चर्चा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
