भांगरभूंय | प्रतिनिधी
मोरजी पंचायत मंडळाची सरकारा कडेन मागणी
पेडणें, प्रतिनिधी : फाटल्या आठ दिसां आदीं मोरजी पंचायत वाठारांतल्या विठ्ठलदास वाड्यार दर्यादेग वाठारांत परंपरीक नुस्तेंमारी करपी वेवसायिकाची एक खोंप कसलेच तरेची सुचोवणी दिनासतना पर्यटन खात्यान मोडून उडयली. ह्या दोग अधिकार्यांचेर खर कारवाय करची, अशी मागणी वेवसायिकां वांगडा मोरजी पंचायत मंडळान केल्या.
मोरजे पंचायत मंडळान त्या नुस्तेमाराक अर्थीक मजत भेटयली. ह्या वेळार उपसरपंच पवन मोरजे, आदले उपसरपंच अमित शेटगांवकार, आदले सरपंच तशेंच पंच वांगडी मंदार पोके, पंच वांगडी मुकेश गडेकार आनी वेवसायीक हाजीर आशिल्ले.
मोरजी विठ्ठलदास वाड्यावेल्या दर्यादेग वाठारांत शेकड्यांनी नुस्तेंमारी करपी व्हडीं आसात. ही व्हडीं पर्यटन वेवसाय सुरू जावचे पयलीं सरकारी जमनीचेर खोंपी उबारून व्हडीं आनी जाळीं सुरक्षीत दवरतात. गोंय मुक्ती पयलीं पसून ही परंपरा सुरू आसा. तिका लागून ही सरकारी जमीन अजून सुरक्षीत आसा. पूण पर्यटन खात्याच्या कांय अधिकाऱ्यांनी कसलेच तरेची पुर्वकल्पना दिनासतना भितरली एक खोंप पुरायेन मोडून घातली. हाची गंभीर दखल मोरजी पंचायत मंडळांन घेतल्या. खोंप मोडची न्हय अशी विनवणी अधिकार्यां कडेन केली. पूण पर्यटन अधिकार्यांनी तांचें कांयच आयकनासतना ती मोडली.
एकूच खोंप मोडून उडोवपा फाटलें कारण कितें? अशें थळाव्यांनी त्या अधिकार्यांक विचारिल्लें. पूण तांणी कसलेच तरेची जाप दिवंक ना. ताका लागन वेवसायीक तिडक उक्तायतना दिसतात.
मजगतीं, मोरजी पंचायत मंडळान जे दोग अधिकारी खोंप मोडपा खातीर हाजीर आशिल्ले ताचेर खर कारवाय करची अशी मागणी थळावे पंच वांगडी विलास मोर्जे हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
