भांगरभूंय | प्रतिनिधी
सुभाष वेलिंगकार: राष्ट्रीय मातृशक्तीचो युवती प्रशिक्षण वर्ग उमेदीन
मातृशक्तीन कुटूंबाचो विचार करचोच, कुटूंबूय सांबाळचें, हे विशीं कसलोच वाद ना. पूण वांगडा देशाचोय विचार तितक्याच खरपणान करपाक जाय, अशें मत भारतमाता की जय संघाचे संघचालक सुभाष वेलिंगकार हांणी उक्तायलें.
राष्ट्रीय मातृशक्ती – गोंय हांचो युवती प्रशिक्षण वर्ग ता. 30 एप्रील ते 01 मे 2022 ह्या मजगतीं महालसा नारायणी देवस्थान वेर्णा हांगा जालो. महालसा नारायणी देवस्थानाचे विश्वस्त रामदास सराफ हांचे हस्तुकीं वर्गाचें उक्तावण जालें. ह्या वर्गाच्या समारोपा वेळार मुखेल सोयरे म्हणून वेलिंगकार उलयताले.
बायलांनी राष्ट्रहीत लक्षांत घेवन कशें जगचें, हे विशीं मार्गदर्शन करपाच्या उद्देशान ह्या मेळाव्याचें आयोजन केल्लें. रायबंदर हांगच्या गुन्यांव अन्वेशण विभागाचे विद्यानंद पवार हांणी युवतींच्या मुखार ह्या विशयां विशीं विचार मांडले. उपरांत आपली कुटूंब वेवस्था हाचेर गटचर्चा सत्र घेतलें. दुसर्या दिसा दोन वरांचें स्वरक्षण शारिरीक कार्यावळ जाली. हातूंत दंड, कराटे, तलवारबाजी अशे तरेचें प्रशिक्षण दिलें.
उपरांत सोळा संस्कार ह्या विशयाचेर वैद्य सुविनय दामले हांणी बायलांक मार्गदर्शन केलें. ’गर्व से कहो हम हिंदू है‘ हे विशीं विवेक लक्ष्मण जोशी, जाल्यार ‘लव जिहाद’ ह्या विशयाचेर चेतन राजहंस हांणी मार्गदर्शन केलें.
राष्ट्रीय मातृशक्ती गोंयचो हो पयलोच वर्ग जाका बरो प्रतिसाद मेळ्ळो. ह्या वर्गांत 503 बायलांनी वांटो घेतलो. हो वर्ग येसस्वी करपा खातीर भारत माता की जय संघाचे कार्यवाह प्रवीण नेसवणकर आनी राष्ट्रीय मातृशक्ती पालक गणेश गावडे हांणी मोलाची कामगिरी केली.
राष्ट्रीय मातृशक्ती ची कार्यकरणी अध्यक्ष शुभांगी गावडे, नीलांगी शिंदे, मेधा प्रभुदेसाय, विशाखा फळदेसाय, अॅड. रोशन सामंत, वैशाली आमोणकार आनी शेफाली नार्वेकार हांणी व्हड योगदान दिलें. ह्या वर्गाची मुखेल शिक्षिका म्हणून ईशा नेसवणकार जाल्यार वर्ग संचलन निलांगी शिंदे हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
