भांगरभूंय | प्रतिनिधी
24 वर्सां उपरांत काँग्रेसीक मेळ्ळे गांधी कुटुंबा भायले अध्यक्ष
खबरां संस्था I नवी दिल्ली
काँग्रेस अध्यक्षपदाचे वेंचणुकेंत काँग्रेसीचे ज्येश्ठ फुडारी, खासदार मल्लिकार्जुन खर्गे भोवमतान जैतिवंत जाल्यात. तांची काँग्रेसीचे नवे अध्यक्ष म्हूण निवड जाल्या. हे वेंचणुकेंत मल्लिकार्जुन खर्गे हांकां 7,897 मतां मेळ्ळीं. तांचे विरोधांत वेंचणूक लडोवपी काँग्रेस खासदार शशी थरूर हांकां 1,072 मतां मेळ्ळीं. खर्गे हांची भोवमतान अध्यक्षपदार निवड जाल्या. वट्ट 24 वर्सां उपरांत काँग्रेसीक गांधी कुटुंबा भायली व्यक्ती अध्यक्ष म्हूण मेळ्ळ्या.
मजगतीं, हे वेंचणुकेंत 400 परस चड मतां बाद जाल्ल्याची म्हायती मेळ्ळ्यां.
निकाल जाहीर जाले उपरांत शशी थरूर हांणी ट्विट करून मल्लिकार्जुन खर्गे हांकां परबीं भेटयल्या. काँग्रेस पक्षाचे अध्यक्ष जावप ही व्हड सन्मानाची गजाल. पूण तेच वांगडा ती व्हड जापसालदारकी आसा. आपणाक मतां दिवपी एक हजारा वयर काँग्रेस फुडाऱ्यांचे उपकार, अशें थरूर हांणी म्हणलें.
काँग्रेसींत सगले एकसमानः खर्गे
स्वातंत्र्याच्या 75 वर्सांत काँग्रेसीन देशांतली लोकशाय घटमूट केल्ली आसून संविधानाचे रक्षण केलां. आयज लोकशाय धोक्यांत आसा आनी संविधानाचेर हल्लो जाता, अशें परिस्थितींत काँग्रेसच्या अंतर्गत वेंचणुकीन लोकशाय घटमूट करतले, अशें मल्लिकार्जुन खर्गे हांणी म्हणलें. म्हारगाय दिसान दीस वाडत आसा. सरकारा कडल्यान देशांत द्वेश पातळावपाचें काम चल्लां. काँग्रेसींत सगले समान आसात. सगल्यांनी कार्यकर्त्यां प्रमाण काम करचें. जातीयवादाच्या नांवा खाला लोकशाय संस्थांचेर हल्लो करपी फॅसिस्ट शक्ती आड आमकां एकवटान लडपाचें आसा, अशेंय तांणी म्हणलें.
काँग्रेसीक वट्ट दोन दशका उपरांत म्हणल्यार 24 वर्सांनी गांधी कुटुंबा भायली व्यक्ती अध्यक्ष म्हूण लाबल्या. हाचे आदीं सीताराम केसरी हे 1996 ते 1998 ह्या काळांत काँग्रेसचे राष्ट्रीय अध्यक्ष आशिल्ले. तांचे उपरांत सोनिया गांधी हांणी अध्यक्षपदाची जापसालदारकी स्विकारली. आतां परतून एकदां मल्लिकार्जुन खर्गे हांच्या रुपांत काँग्रेसीक गांधी कुटुंबा भायलो अध्यक्ष मेळ्ळा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
