भांगरभूंय | प्रतिनिधी
दामोदर शिरोडकार: दिंडी उत्सवाचे पयलीं काम पुराय करपाचें उद्दिश्ट
मडगांव: मडगांव नगरपालिकेच्या वारसो इमारतीच्या रंगकामा खातीर 13 लाख रुपयांच्या कामाची निविदा काडल्या. पालिका इमारतीचो आदलोच तांबडो रंग परतून दितले. मडगांव दिंडी उत्सवाचे पयलीं हें काम पुराय करपाचें उद्दिश्ट आशिल्ल्याचें नगराध्यक्ष दामोदर शिरोडकार हांणी सांगलें.
मडगांव पालिका मंडळाचे फाटले बसकेंत नगरसेवकांनी मडगांव पालिकेच्या वारसो इमारतीचो पोरणो आनी मुळचो तांबडो रंग वापरून रंग मारपाची शिफारस केल्ली. ते प्रमाण निविदा काडल्या. मडगांवच्या दिंडी उत्सवाचे पयलीं रंग मारपाचें काम पुराय जातलें अशी आस्त आसा. गोंय राज्य नागरी विकास संस्थेच्या (जीसुडा) सल्लागारांनी ह्या रंगकामाचो अदमाशेक खर्च तयार केला. ताची प्रत मेळ्ळे उपरांत नुतनीकरण येवजण सरकारा कडेन धाडचे पयलीं नगरसेवकां कडल्यान चर्चा करून ताका तत्काळ मंजुरी दितले अशें नगराध्यक्ष शिरोडकार हांणी सांगलें.
भोवस्तरीय पार्कींग प्रकल्पा खातीर वेंचिल्ल्या पालिका इमारतीचे फाटले वटेन आशिल्ल्या पोरण्या नुस्त्या बाजाराचे सुवातेर सद्या मातयेचें परिक्षण सुरू आसा. पालिका लिपिका कडल्यान सोपो कराचे संकलन निधींतल्यान 17 लाखांचो घोटाळो केला. ह्या प्रकरणांत पालिकेन पुलीस कागाळ केल्या आनी दुबाविताचेर खर कारवाय करपाचे निर्देश दिल्यात.
निलंबन हो एक पर्याय आसून पालिकेचे पयशे वसूल करपाचेर भर आसतलो अशें शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
