भांगरभूंय | प्रतिनिधी
भारतान आशिया करंड क्रिकेट सर्तीच्या सुपर चारांत सुवात मेळयली. काल जाल्ले मॅचींत ताणें नेपाळाक 10 विकेटींनी हारयलो. ह्या जैता सयत भारताचे तीन गूण जाले. ह्या गटांतल्यान पाकिस्तानान पयलींच सुपर चारांतली आपली सुवात निश्चीत केल्या. नेपाळाचें आव्हान सोंपलें. ताणें आपल्यो सुरवातीच्यो दोनूय मॅची वगडायल्यात.
कॅण्डीच्या पल्लेकेले स्टेडियमाचेर नेपाळान टॉस हारल्या उपरांत पयलीं बॅटींग करतना 48.2 ओव्हरींनी 230 धांवड्यो केल्यो. मोखीचो फाटलाव करतना भारतान 2.1 ओव्हरींनी 17 धांवड्यो केल्ल्यो, त्या वेळार पावसान हाजेरी लायली. ते उपरांत अंपायरांनी भारताक डीएसएल नेमा खाला 23 ओव्हरींनी 145 धांवड्यांची सुदारीत मोख दिली. रोहित शर्मा आनी शुभमन गिल हाणें 20.1 ओव्हरींनी मोख मेळयली. मुखेली रोहित शर्मान नाबाद 74 आनी शुभमन गिलान नाबाद 63 धांवड्यो केल्यो.
ते आदीं नेपाळान भारताची बॉलींग फोडून काडली. मोहम्मद शमी, मोहम्मद सिराज, शार्दुल ठाकूर, हार्दिक पांड्या, रवींद्र जडेजा आनी कुलदीप यादव ह्या सारक्या दिग्गज बॉलरां मुखार 230 धांवड्यो केल्यो.
नेपाळा वतीन आसिफ शेखान सगल्यांत चड 58 धांवड्यो केल्यो. आठवे सुवातेर बॅटींग करपी सोमपाल कामीन 48 धांवड्यांचें योगदान दिलें. भारता वतीन मोहम्मद सिराज आनी रवींद्र जडेजा हाणें दरेकी तीन विकेटी घेतल्यो.
आसिफ शेखान वन डे कारकिर्दींतलो 10वो अर्द शेंकडो पुर्ण केलो. ताणें 97 बॉलांनी 58 धांवड्यो केल्यो.
भारताच्या फिल्डरांनी कांय सोंप्यो कॅची सोडल्यो. पयले ओव्हरीच्या निमाण्या बॉलाचेर श्रेयश अय्यरान पयले स्लिपांत कॅच सोडली. दुसरे ओव्हरीच्या पयल्या बॉलाचेर विराट कोहलीन शॉर्ट कव्हरांत कॅच सोडली. उपरांत पांचवे ओव्हरीच्या दुसऱ्या बॉलाचेर विकेटकीपर इशान किशानान कॅच सोडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
