भांगरभूंय | प्रतिनिधी
भारतांत आतां खेळ हो खेळ उरूंक ना, तर राजकी सुवार्था खातीर खेळ ह्या सोबीत नांवा खाला राजकारणूच खेळप चालू आसा. ताचे कडेन आमी सगल्यांनी खेळ म्हूण पळोवप आनी शक्य जाल्यार ताचेरुच समाधान मानून घेवप, इतलेंच आमच्या हातांत उरलां. भारतीय फुटबाॅलाची आयज जी शोकांतिका जाल्या, ती दुर्दैवी आसली तरी ताका आमीच जापसालदार. राजकारण्यांच्या हातांत खेळाचीं सुत्रां दिलीं काय ताचे कितें परिणाम भोगचे पडटात, ताचें हें एक जितें जिवें उदाहरण.
भारतीय फुटबाॅलाचो आयज मेरेनचो इतिहास तसो दोळे दिपकावपी नासलो तरी फाटल्या 84 वर्सांच्या इतिहासांत एका काळ्या अध्यायाची भर, फिफा ह्या संवसारीक फुटबाॅल म्हासंघान हालींच दिल्ल्या निर्णयान निश्चितूच पडल्या. आयज संवसारीक क्रिकेटींत भारत एक महाशक्त आशिल्ल्यान क्रिकेट जगांत भारतीय क्रिकेट नियामक मंडळ आपल्याक जाय तें करता अशें दिसता, पूण फुटबॉल- हॉकी सारकिल्ल्या खेळांत आमी इतले सकयल पावल्यात की ह्या खेळांच्या संवसारीक फेडरेशनां मुखार आमची दाळ मात्तूय शिजना आनी ताका लागून भारतीय फुटबॉलाक आंतरराश्ट्रीय दारां बंद करपाचें धाडस “फिफा”न केलें आनी हें सगळें शांतपणान पळोवपाचो, सोंसपाचो वेळ आमचेर आयला.
भारतीय क्रिकेटांत मात्तूय राजकारण ना, अशें म्हाका म्हणपाचें ना, पूण ताचे वयरुय क्रिकेटींतली उफेवपी गुणवत्ता आमच्या आदाराक येता आनी ताकाच लागून भारत आयज जागतीक क्रिकेटीचीं सुत्रां आपल्याक जाय तसो हालयता. आमच्या फुटबॉलांत हो असामान्य गूण वखदाक लेगीत मेळना. प्रफुल्ल पटेल आनी तांचे सारकिल्या वसवशिल्ल्या लोकांक लागून आमचो आशिल्लो नाशिल्लो दर्जो सामको रसातळाक पावला.
संवसारीक फुटबॉलांत आमची सुवात 104 वा 105 क्रमांकाचेर आसा. ही गजाल खंयच्याय भारतीयान अभिमान बाळगुपा सारकी न्हय. हें मतींत घेतल्यार ‘फिफा’न अखिल भारतीय फुटबॉल फेडरेशनाचेर बंदी घालपाचें धाडस कित्याक केलें, तें स्पश्ट जाता. ‘फिफा’ क हे विशीं विचारपाचें धाडस आमकां जातलें काय, होय प्रस्न आसा. भारतीय क्रिकेटांत आमी सगळें करून नामानिराळे रावपाक शकले, इतलेंच न्हय, तर आयसीसीकय जायते फावटीं शिंगांरुय घेतल्या. फुटबॉलांतूय अशेच दीस येतले हाची आमी वाट पळयतात, पूण तें घडटा अशें दिसना. ह्या खेळांत जें राजकारण जाता तें पळयल्यार तशी आशा बाळगुची, अशीय परिस्थिती ना.
भारत हो 130 कोटी लोकांचो देश. आमचो संवसारीक क्रमांक शंबर देशां सकयल आसा, हाचे वयल्यान आमच्या फुटबॉलाचो दर्जो कळटा. इंग्लीश प्रिमियर लीगाचे फुटबॉल संचालक नील सॅंडर हालींच भारतात आयिल्ले. भारतीय फुटबॉलाचो दर्जो वाडोवपा खातीर खूब कितें करपाची गरज आसा अशें सांगून आमचे खेळगडे इंग्लीश प्रिमियर लीगांत खेळटना दिसतले, तोच भांगराचो काळ आसतलो, अशें सांगून फुटबाॅलाचो दर्जो वाडोवपाक खूब कितें करपाची गरज आसा, अशें तांणी म्हणिल्लें. प्रफुल्ल पटेल फाटलीं बारा ते तेरा वर्सां भारतीय फुटबॉल महासंघाचे अध्यक्ष आसात आनी ते कदेल सोडपाक तयार नाशिल्ल्यान भारतीय फुटबॉलाचेर हो वेळ आयला. फुटबॉलाक केन्नाच पांय लावंक नाशिल्ले लोक फुटबॉलाचे प्रशासक जाले उपरांत अशी दुर्गत जाली ना, तरूच अजाप. पटेलाक परतून अध्यक्ष जावपाचो खरो नैतीक अधिकार नाशिल्लो. ते पद सोडपाक तयार नाशिल्ले. निमाणे न्यायालयानच तांकां पदा वयल्यान काडले, पूण तांचो नेट अजून कायम आसा. फेडरेशनांत सत्तेचो संघर्श चालूच उरलो आनी न्यायालयाच्या हस्तक्षेपान नेमिल्ली प्रशासकीय समिती फिफाक तिसरो पक्ष अशें दिसलें आनी ताका लागून तांणी बंदी घाली. हाकाच लागून ह्या खेळाचो मोग करपी जायत्या जाणांक भारतीय फुटबॉलाचो फुडार काळखी दिसता.
आमच्या देशांत भोवतेक खेळांचें प्रशासकीय फुडारपण आयज फुडारीच करतात. हे रचणुकेंत जो मेरेन बदल जावचो ना, तो मेरेन संवसारीक पांवड्याचेर मैदान गाजोवपाच्यो गजाली आमकां करपाक मेळच्यो नात. लोकसंख्येन गोंया परस ल्हान आशिल्ले जायते देश संवसारीक करंड सर्तींत खेळटना आनी बळिश्ट पंगडां आड दोन हात करतना आमी पळयतात, तेन्ना अजाप दिसता. इंग्लीश प्रिमीयर लिगेंतल्यो मॅची पुराय संवसार वर्ल्ड कप सर्तींतल्यो मॅची पळोवच्यो, ते उमेदीन पळयतात, पूण हे लिगेंत तळाच्या पंगडांत पसून एकूय भारतीय खेळगडो खेळपाक शकना, ही वस्तुस्थिती. हे लिगेंत 100 परस चड देश, तातूंतय सुरीनाम, जिब्राल्टर, क्युबा, गिनी, माल्टा, फिलीपायन्स अशे ल्हान देश प्रतिनिधित्व करतना आमी एकूय खेळगडो जर फाटल्या बऱ्याच वर्सांनी दिवपाक शकनात, जाल्यार 10-15 वर्सां कदेलां तापोवप्यांक खरें तर जापसालदार धरून गोळाक लावपाची गरज आसा. पूण, चलता हे होच आमचो मंत्र जावन बसला. राष्ट्रकुलांतलें भोंवतेक येश हें खेळगड्यान वैयक्तीक पांवड्याचेर केल्ले मेहनतीचें येश, अशें म्हजें प्रामाणीक मत. पूण ह्या येशाचेंय स्रय घेवपाक जायत्या राज्यांतले राजकारणी फाटीं नात.
आमच्या गोंयांतूय हाचे परस वेगळें चल्लां अशें म्हणपा सारकी स्थिती ना. भोवतेक खेळांच्या राज्य पांवड्या वयल्या असोसिएशनाच्या अध्यक्षपदाचे कदेलीचेर राजकी व्यक्तीच बशिल्ली दिसता. फुटबाॅलांत गोंयचो एक वेगळो शेक एका काळार आशिल्लो,पूण राजकारणान ह्या खेळाची सामकी वाट लायली. तेन्नाचे मुख्यमंत्री स. मनोहर पर्रीकार हांणी राजकी फायदो घेवपाक गोंय फुटबाॅल विकास म्हामंडळाची स्थापन करून अशे व्यक्ती कडेन ताचें अध्यक्षपद दिलें की ताका ताचे खातीर वेळ दिवप शक्य नासलें. आयज 10 वर्सां उपरांत ह्या म्हामंडळाचो गोंयांतल्या फुटबाॅल विकासा खातीर कितलो फायदो जालो, हाची जाप कोणाकूच दिवपाक जावची ना. उरफाटी गोंय फुटबाॅल असोसिएशनाक समांतर अशी ही वेवस्था थारिल्ल्यान ताचें लुकसाणूच चड जालें, हें न्हयकारपाक मेळचें ना. देशांतल्या फुटबाॅलाचीय हीच शोकांतिका. आयज सर्वोच्च न्यायालयांत देशांतल्या फुटबाॅलाक तारपी असो निर्णय जावचो आनी निर्धारित वेळापत्रका प्रमाण 17 वर्सां सकयल्या चलयांच्या संवसारीक करंड सर्तींतल्यो मॅची गोंयांत जावन तो आंगार रोमांच हाडपी खीण अणभवपाची संद आमकां मेळची, इतलीच अपेक्षा.
वामन प्रभू
98231 96359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
