भांगरभूंय | प्रतिनिधी
मडगांव, प्रतिनिधी : संजीवनी उस उत्पादक शेतकारांनी पणजे आंदोलन केलें. उस उत्पादन केल्या उपरांत कर्नाटक, महाराष्ट्रांत उस धाडचो पडटा. ताका लागून साकर कारखानो सुर करपाची मागणी शेतकार करतात. सरकारान आस्वासन दिवनूय कारखानो सुरू करूंक ना. भाजप सरकार फक्त आस्वासनां दिता. तीं पुराय करिना. आतां मेरेन जायतीं आस्वासनां दिलीं. पूण तीं पुराय करूंक ना अशी टिका दक्षीण गोंय खासदार फ्रान्सिस सार्दीन हांणी केली.
दक्षीण गोंय जिल्हो कॉंग्रेस कार्यालयांत खासदार सार्दीन हांणी पत्रकार परिशद घेवन राज्य आनी केंद्र सरकारान खुबशीं आस्वासनां पुराय करूंक ना अशें तांणी म्हणलें.
म्हारगाय, पॅट्रोल दर वाड, बेरोजगारी अशे जायते प्रस्न तशेच आसात. भारता कडल्यान इंधन घेवपी देश उण्या दरान इंधन विकतात. पूण देशांत लिटर पेट्रोला फाटल्यान २० रुपयांचो फायदो सरकार काडटा. राज्यांत रेंव वेवसाय कायदेशीर करपाचें आस्वासन केलें पूण आजूनय कायदेशीरपणान रेंव उसपपाक सुरवात जावंक ना. रेंवेंचें वाडिल्लें दर उणें जायना आनी लोकांक हाचो अर्थी फटको बसता. वीज समस्या कायम आसतना वीज बिलांचें दर वाडटा. नवो मिटर बसोवपाची गरज आसल्यार तो बसोवचो पूण व्हडली व्हडलीं बिलां लोकांचेर तकलेर फोडचीं न्हय. लोकांक दिल्लीं आस्वासनां सरकारान पुराय करचीं, असो उलो सार्दीन हांणी मारलो.
भिकार्यां विशींचो प्रस्न सोडयात
बसस्टॉप, सिग्नल आनी हेर सुवातांचेर भिकार्यांचो आंकडो वाडला. गोंय पर्यटन राज्य आशिल्ल्यान असल्यो गजाली बंद जावपाक जाय. भीक मागपी लोक आनी भुरगी भायल्या राज्यांतलीं आसतात. तांकां तांच्या घरा परत धाडचें. नाजाल्यार तांकां गरिबां खातीरच्या घरांनी धाडचें अशी मागणी खासदार सार्दिन हांणी केली. राज्यांत विवीध फेस्तां सरकारी पांवड्यार जातात. पूण रस्त्याचे दुरुस्ती कडेन कोणूच लक्ष दिना. रस्त्याचे दुरुस्तीचीं कामां सरकारान हातांत घेवचीं. तशेंच ह्या भिकार्यांची समस्या सोडोवची अशें तांणी सांगलें.
गोंयचे छाननी समितींत गोवा प्रभारी माणिकराव ठाकरे हांची नियुक्ती जाल्या उपरांत पयलेच फावट ते गोंयांत आयल्यात. तांणी पदाधिकार्यां कडल्यान सद्याचे स्थितीचो आढावो घेतलो. पक्षाचे मुजती खातीर उपाय काडपाचेर ते भर दितात. हेच फाटभूंयेर लोकसभा वेंचणुकांची चाचपणीय करतात, अशें खासदार ङ्ग्रान्सीस सार्दिन हांणी सांगलें.
जनमत कौल दिसा लोहिया मैदानाचेर जाहीर सभा
कॉंग्रेसी वतीन मडगांवच्या लोहिया मैदानाचेर १६ जानेवारीक रोजी जनमत कौल दीस मनयतले. ह्या निमतान सांजेवेळार ४ वरांचेर जाहीर बसकेचेंे आयोजन केलां. गोंयचे जनतेन हे बसकेक हाजीर रावपाचो उलो खासदार सार्दिन हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
