भांगरभूंय | प्रतिनिधी
गोविंद गावडेः मडगांवां बिरसा मुंडा पुण्यतीथ पाळ्ळी
मडगांव: आदिवासी समाज क्रांतीचे जनक आनी म्हान स्वातंत्र्यसैनीक बिरसा मुंडा ही विचारांची धार. तांचे प्रेरणादायी व्यक्तिमत्त्व आदिवासी समाजा खातीर म्हत्वाचें, अशें कला आनी संस्कृती खात्याचे मंत्री गोविंद गावडे हांणी सांगलें. रवींद्र भवन मडगांवां उटा संघटणे वतीन आयोजीत भगवान बिरसा मुंडा पुण्यतीथ कार्यावळींत ते मुखेल सोयरे ह्या नात्यान उलयताले.
आदिवासी समाजाक संघर्श केले खेरीत केन्नाच कितेंच मेळूंक ना. गुलामांच्या विरोधांत आवाज काडटले तेन्नाच गुलागिरींतल्यान मुक्त जातले. आदिवासी समाज हो सोंशीक समाज. घटणेंत ह्या समाजाक खूप कितें दिला, मात ते फक्त कागदाचेरूच आसा. आपूण सरकारांत कॅबिनेट मंत्री आसा मात, केन्नाच गुलामगिरी स्विकारली ना, अशें गावडे हांणी सांगलें.
बिरसा मुंडा कोण हे आयच्या तरणाट्यांनी समजून घेवपाची गरज आसा. समाजाची विचार सरणी एक आसप गरजेची. समाजाची उदरगत जातली जाल्यार शिक्षण खूप म्हत्वाचें. आदिवासी समाज सुसंस्कृत जावपा खातीर ह्या समाजाक कोणाच्या उपदेशाची गरज ना. ह्या समाजा कडेन सोंशीकसाण आसा. ते खातीरूच तांचेर अन्याय अत्याचार जाता, अशें गावडे हांणी सांगलें.
पुण्यतीथ कार्यावळींत आदिवासी समाजा खातीर वावुरिल्ले साश्टींतले फुडारी लुईस आलेक्स कार्दोज, आदले आमदार आंतोन गांवकार, सॅबेस्तांव मिरांडा, पिटर गामा, जाॅन रायकार, आंतोन फ्रांसीस हांचो मरणा उपरांत भोवमान केलो.
उटा संघटणा 9 ऑगस्टाक राजीव गांधी कला मंदिर फोंड्यां संवसारीक आदिवासी दीस मनयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
