भांगरभूंय | प्रतिनिधी
शेकड्यांनी वर्सां सावन भारता सयत संवसारांत सगलेच कडेन बायलांक दुय्यम वागणूक मेळत आयल्या. अमेरिकेंत तर तांकां राष्ट्रीय पांवड्याचेर 1920 त मतदानाचो हक्क मेळ्ळो. ब्रिटनांतूय ह्याच सुमाराक. शिक्षण घेवपाक तर तांकां बंदीच आशिल्ली. भारतांत सावित्रीबाई फुले, महात्मा ज्योतिबा फुले दांपत्यान 1848 त शाळा सुरू करून बायलांक शिक्षण दिवपाक सुरवात केली. (तशीं 17 व्या शेंकड्या सावन गोंयांत बायलां शिकतालीं. खास करून धर्मीक शिक्षण. 1846 त बायलां खातीर गोंयांत पयली मुळावी शाळा सुरू जाली. आयज साबार मळांचेर बायलो खांदाक खांद लावन वावुरतात. मात, धर्म, संस्कृतायेचें चेपण आशिल्लो समाज तांकां दादल्यां परस सकयली वागणूक दिता. विधवां आडच्यो रिती हें एकूच उदाहरण पुरो. बायलांचेर जावपी अत्याचारूय उणे जावंक नात. गोंयांत आनी देशांतूय. सरकारी यंत्रणेन बायलां सुरक्षीत उरतलीं, हाची जतनाय घेवपाचो वेळ आयला.
आम आदमी पक्षाच्या फुडाऱ्यांनी काल बायलां विशीं म्हायती उक्तडार हाडल्या. ती हुस्को करपा सारकी आसा. 2023 वर्सा गोंयांत बायलां आड 288 गुन्यांव नोंद जाल्ले. 2024 त ते वाडून 365 जाले. म्हणल्यार दिसाक एक गुन्यांव. पोरूं बायलांचे सात खून जाल्यात. तर बलात्काराच्यो 47 घडणुको. अर्थांत हे सगले आंकडे पुलिशेंत नोंद जाल्ले. चडशीं घरगुती झगडीं आनी मोगाचीं प्रकरणां. फाटल्या कांय वर्सांनी चलयांक दुबावीत मरणां आयल्यांत, तांचो तपास लागूंक ना. आम आदमी पक्षाचे पत्रकार परिशदेंत एक आरोप जालो, तो म्हणल्यार जीएचबी ड्रग्साचो. पुलिसांनी जप्त केल्ल्या घुंवळे वखदांनी हें ड्रग्स सांपडलां. ताका ‘रेप ड्रग्स’ ह्या नांवानूय वळखतात. चलयांक डेटीचेर वा रातचें पबांनी व्हरून थंड पेयांतल्यान हें ड्रग्स दिलें काय तीं घुंवळटात. आपूण कितें करता तें तांकां कळना. मागीर तांचे वांगडा गेल्लो चलो आपलें काम सादोवन घेता. बलात्काराच्या प्रकरणांनी असले प्रकार घडल्यात खंय. हाचे पयलींय ह्या ड्रग्साचें नांव आयिल्लें. सरकारी यंत्रणा मोगी जोडप्यांक आडावंक शकना तरी ह्या ड्रग्साचेर, तें विकप्यांचेर नियंत्रण दवरूंक शकता. न्हय तांणी तें दवरचें. हातूंत चलयांनीय चड जतनाय घेवंक जाय. पूण, आधुनीकताय, स्वातंत्र्याच्या नांवा खाला आपणाक जाय तशें वागपाची मेकळीक आसा, अशें कोण समजता, जाल्यार ताका कोणूच कांय करपाक शकनात. रातचे, मध्यानरातीं पार्ट्यांक, पबांनी वचपाचें प्रकार खूबच वाडल्यात. पालकांनीय जागृत रावपाचो वेळ आयला. सगल्यांक आचार, विचाराचें स्वातंत्र्य आसा, पूण ताचो स्वताच्या जिवाक धोको निर्माण जाय मेरेन फायदो घेवप चुकीचें.
आम आदमी पक्षाच्या दाव्या प्रमाण, नॅशनल क्रायम रिकाॅर्ड ब्युरो म्हणल्यार एनसीआरबीचो अहवाल मेळना. ही संघटणा देशांत कितले गुन्यांव घडले ताची नोंद दवरता. 2022 उपरांत तांचो अहवाल उजवाडाक येवंक ना. तो कित्याक येवंक ना, नेमकें कितें जालां, ताचो तपास केंद्र सरकारान करपाक नाका? कोणे हो डेटा तयार करपाक आळस केला वा लिपोवन बी दवरला जाल्यार ताचो सोद घेवंक जाय. कारण ताचे वयल्यान बायलांचेर जावपी अत्याचाराचो आंकडो स्पश्ट जातलो. आमच्या भारताक कांय देश बायलां वयल्या अत्याचारांचे बाबतींत सगल्यांत धोक्याचो देश मानतात. अर्थांत हें वाचून, आयकून राष्ट्रप्रेमी तिडकतले. फाटल्या कांय वर्सांनी बायलांचेर अत्याचार जावंकूच नात, अशेंय कांय जाण म्हणटले. मात आंकडे वेगळेच सांगतात. अर्थांत ते 2022 मेरेनचे. त्या वर्सा बायलां आडच्या अत्याचाराच्यो 4, 45,256 केशी नोंद जाल्ल्यो. म्हणल्यार दिसाक 1220 जाल्यो. कांय जाणांच्या मतान, प्रत्यक्षांत हो आंकडो कितलेशेच पटीन चड आसा. कारण सगल्योच बायलो कागाळ करिनात. बायलांचेर घरांत, कामाच्या जाग्यार अत्याचार जातात. छळ जाता. बलात्कार, विनयभंग, मारपेटा सारके गुन्यांव तर सदचेच. 18 ते 30 वर्सां पिराय गटांतल्या बायलांक हें चड भोगचें पडलां. शिक्षण घेतलें म्हूण मनीस सुशिक्षीत, सुसंस्कृत जायना, तें हें सगलें वाचतकच जाणवले बगर रावना.
बायलांचेर जावपी अत्याचार आडावपाक साबार जाण उपाय सांगतात. ते चालिकूय लागतात, मात अत्याचार उणें जावंक नात. सगले कडेन बायलांचें खास पुलीस स्टेशन सुरू करपाक जाय. गोंया सयत साबार कडेन तें आसा. मात ताचो आंकडो वाडप गरजेचें. बायल पुलीस अधिकारी, कर्मचारी अन्याय जाल्ले बायलेक बेगोबेग मेळपाक जाय. तांची वाट पळयत बसचें पडप, फावटी मारच्यो पडप हें योग्य न्हय. समाजांतल्यो बायलो, ज्येश्ठ नागरीक, विद्यार्थी, जुंवानपणार पावल दवरपी तरणाटे हांचें मदीं संवाद जावपाक पुलीस, वकिलांनी फुडाकार घेवप म्हत्वाचें. बायल शिक्षकांनीय जागृत रावचें. चलयांक खास करून शाळांनी सादूर कशें रावप, धोके हाचे विशीं म्हायती दिवप बरें. सोशल मिडिया वरवीं कशी फटवणूक जावं येता, हाची एकान एक बायलांक खबर आसप चडूच म्हत्वाचें.
एके वटेन आमी देवीक पुजतात आनी दुसरे वटेन बायलांचेर अत्याचार जातात. हें दोट्टी वागप पुरो आतां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
