भांगरभूंय | प्रतिनिधी
तिगांय जखमींक एक कोटी दिवपाचो उच्च न्यायालयाचो आदेश
पणजी : बाणस्तारी अपघातांत मरण आयिल्ल्या सुरेश आनी भावना फडते तशेंच अरूप करमाकर हांच्या कुटुंबियांक दरेकी 50 लाख रुपया, जाल्यार जखमी शंकर हळर्णकार हांकां 40 लाख, वनिता भंडारीक 35 लाख आनी राज माजगांवकार हांकां 25 लाख रुपया दिवपाचो आदेश बुधवारा मुंबय उच्च न्यायालयाच्या गोंय खंडपिठान दिला. मर्सिडीझ मोटारीची धनी मेघना सिनाय सांवड्डेंकार हिणें मंगळारा दोन कोटींची रक्कम न्यायालयांत जमा केल्ली.
बाणस्तारी अपघात प्रकरणांत मोटार वाहन अपघात लवादा कडेन लुकसाण भरपाये विशीं खटलो आयल्यार तो 6 म्हयन्यां भितर निकालांत काडपाचो आदेश खंडपिठान दिला. सोऱ्याचे घुंवळेंत मर्सिडीझ मोटार चलोवन श्रीपाद उर्फ परेश सिनाय सांवड्डेंकार हांणी 6 ऑगस्टाक बाणस्तारी पुलाचेर तिगांचो जीव घेतलो. तशेंच ह्या अपघातांत तीग जाण गंभीर जखमी जाल्ले. अपघातांत मरण आयिल्ल्या आनी गंभीर जखमींक लुकसाण भरपाय आनी वैजकी खर्चा खातीर दोन कोटी रुपया दिवपाची हमी अपघात जाल्ल्या मर्सिडीझ मोटारीची धनी मेघना हिणें 23 ऑगस्ट दिसा उच्च न्यायालयांत दिल्ली. ते प्रमाण तिणें मंगळारा ही रक्कम न्यायालयांत जमा केली. उपरांत दरेकी 50 लाख रुपया अपघातांत मरण आयिल्ल्यांच्या कुटुंबियांक दिवपाचो आदेश न्यायालयान दिलो. तशेंच जखमी जाल्ल्या शंकर हळर्णकार हांकां 35 लाख, वनिता भंडारी आनी राज माजगांवकार हांकां 25 लाख दिवपाचे आदेश बुधवारा उच्च न्यायालयान दिल्ले.
मजगतीं, मेघना सांवड्डेंकार हिणें न्यायालयांत दोन कोटी रुपया जमा करपाची हमी दिले उपरांत अटकेंत आशिल्ल्या परेश सांवड्डेंकार हाची जामिनाचेर सुटका जाल्ली. जाल्यार मोटार धनी मेघना सांवड्डेंकार हिकाय अटके पसून थाकाय मेळिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
