भांगरभूंय | प्रतिनिधी
केंद्रीय गृह मंत्रालया कडल्यान आदेश जारी
भांगरभूंय I प्रतिनिधी
पणजी : भाजपा फुडारी तशेंच टिकटॉक स्टार सोनाली फोगट हिच्या दुबावीत मरणाचो तपास केंद्रीय गृहमंत्रालयान सीबीआय कडेन दिवपाचो निर्णय घेतला. तशेंच हे विशींचो आदेश लेगीत केंद्रीय गृह मंत्रालयान जारी केला. ताका लागून फोगट मरण प्रकरणाचो तपास आतां सीबीआय करतली.
मजगतीं, मुख्यमंत्री डॉ. प्रमोद सावंत हांणी, फोगट खून प्रकरणाचो तपास सीबीआयन करचो, अशें पत्र आपूण केंद्रीय गृह मंत्रालयाक बरयतलो, अशें सांगिल्लें. सोमारा सकाळीं एके कार्यावळी उपरांत ते पत्रकारां कडेन उलयताले. मजगतीं, फोगट खून प्रकरणाचो तपास केंद्रीय गृह मंत्रालयान सीबीआय कडेन सोंपयला. हे विशींचो आदेश जारी जाला. ताका लागून आतां हे प्रकरण गोंय पुलिसां कडल्यान सीबीआय कडेन सोंपयतले, हे निश्चीत जाला.
सोनाली फोगट मरण प्रकरणाचो तपास पुलीस योग्य पद्दतीन करतात. गोंय पुलिसांचो तपास पुराय जायत आयला. पूण फोगट हिच्या कुटुंबिया कडल्यान सीबीआय तपासाची मागणी जायत आसा. हाका लागून तपास सीबीआय कडेन दिवपाचे सरकारान थारायला. तपास सीबीआय वरवीं जावचो, अशें पत्र केंद्रीय गृह मंत्रालयाक बरयतलो, अशें मुख्यमंत्री डॉ. प्रमोद सावंत हांणी सांगिल्लें.
फोगट हिच्या कुटुंबिया उपरांत हरियाणांतल्या खाप म्हापंचायतीन ह्या प्रकरणाचो तपास सीबीआय कडेन दिवपाची मागणी केल्ली. सोनाली फोगट हिका 23 ऑगस्टाक दुबावीत रितीन मरण आयिल्लें. मरण आयलें उपरांत तिका हॉस्पिटलांत दाखल केल्ली. ह्या प्रकरणांत गोंय पुलिसांनी पयलीं फोगट हिका सैमीक रितीन मरण आयिल्ल्याचें नोंद केल्लें. पूण फोगट हिचो भाव रिंकू ढाका हांणी गोंयांत आयले उपरांत आपले भयणीचो खून जाल्ल्याचो दुबाव उक्तावन चवकशी करपाची मागणी केली. गोमॅकाँत फोगट हिच्या कुडीचो पोस्टमार्टेम जाले उपरांत तिचे कुडीचेर घाय दिसून आयले. तशेंच तिणें उदकांतल्यान ड्रग्स घेतिल्ल्यान मरण अायिल्ल्याचें स्पश्ट जाल्लें. ते उपरांत पुलिसांनी खुनाचो गुन्यांव नोंद करून तपास सुरू केलो. आतां मेरेन पुलिसांनी 5 जाणांक अटक केल्या.
खून प्रकरणांतले मुखेल दुबावीत सुधीर सांगवान आनी सुखविंदर पाल सिंग हांकां पयलींच अटक जाल्या. सध्या ते न्यायालयीन कोठडेंत आसात. सुधीर सांगवान आनी सुखविंदरपाल सिंग हांची चवकशी सुरू आसा. ह्या खून प्रकरणांत आनीक दुबावीत घुस्पिल्ल्याचो दुबाव आशिल्ल्यान पुलिसांनी अदीक तपास सुरू केला. ते खातीर पुलिसांचो एक पंगड हरियाणांत आसा.
हणजूणच्या रामा मांद्रेंकारान घुंवळे वखदां दत्तप्रसाद गांवकाराक दिलीं. दत्तप्रसाद गांवकारान तीं सुधीर सांगवानाक विकलीं अशी म्हायती कबुली जबाबांतल्यान उक्तीं जाल्या. फोगट हिका घुंवळे वखदां जबरदस्तीन पियेवपाक दिवपाचो प्रकार कर्लीस बीच क्लबांत जाल्लो.
फोगट हिच्या कुटुंबियांनी केल्ली मागणी
केंद्रीय गृह मंत्रालयान गोंयांत घडिल्ल्या सोनाली फोगट मरण प्रकरणाचो तपास सीबीआय कडेन दिवपाचो आदेश जारी केला. खबरा संस्थांनी ही बातमी दिल्या. सीबीआय संस्था कार्मीक आनी प्रशिक्षण (डीओपीटी) फांट्या खाला काम करता. केंद्रीय गृह मंत्रालयान फोगट मरण प्रकरणाचो सीबीआय वरवीं तपास करपाचे आदेश कार्मीक आनी प्रशिक्षण फांट्याक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
