भांगरभूंय | प्रतिनिधी
135 विद्यार्थ्यांक अभियांत्रिकीची पदवी
17 विद्यार्थ्यांक भेटयतले पीएचडी
पणजी: राष्ट्रीय तंत्रज्ञान संस्था (एनआयटी) गोंयचो आठवो पदविदान सुवाळो शुक्रारा (30 सप्टेंबर) जातलो. राजभवनाच्या दरबार हॉलांत दनपारां दोन वरांचेर जावपी ह्या सुवाळ्याचे मुखेल सोयरे म्हूण राज्यपाल पीएस श्रीधरन पिल्लई हाजीर रावतले. संस्थेचे संचालक प्राध्यापाक डॉ. गोपाल मुगेराया हांणी पत्रकार परिशदेंत ही म्हायती दिली.
संस्थेंतल्या 135 विद्यार्थ्यांक अभियांत्रिकीची पदवी, 57 विद्यार्थ्यांक पदव्युत्तर पदवी आनी 17 विद्यार्थ्यांक पीएचडी भेटयतले अशें तांणी सांगलें. एनआयआरएफ (नॅशनल इन्स्टिट्यूट रँकींग फ्रेमवर्क) च्या मुल्यांकनांत संस्थेक 88वो क्रमांक मेळ्ळा. फुडारांत पयल्या 50 संस्थां मदीं येवपाची मोख आशिल्ल्याचें तांणी म्हणलें.
देशांतल्या 150 परस चड कंपनीं संस्थेंत विद्यार्थ्यांक नोकरी दिवपा खातीर येत आसतात. दरवर्सा चडश्या विद्यार्थ्यांची निवड जायत आसता. ह्या वर्सा संस्थेचे सगल्या पदविधारक विद्यार्थ्यांक देशभरांतल्यान विवीध कंपनींनी नोकरी मेळ्ळ्या. उण्यांत उणो 14 लाख ते चडांत चड 44 लाख रुपया मेरेनचो वर्सुकी पगार ह्या विद्यार्थ्यांक मेळिल्ल्याचें तांणी सांगलें. जाल्यार सुमार 90 टक्के पदव्युत्तर विद्यार्थ्यांक नोकरी मेळिल्ल्याचें तांणी सांगलें.
संस्थेंतल्या विद्यार्थ्यां बरोबर प्राध्यापकांकूय संशोधना खातीर प्रोत्साहन दितात. संशोधना खातीर निधी दिवपी विवीध संस्थांच्या सहकार्यान प्राध्यापकांनी 17 कोटीचें प्रकल्प हातांत घेतल्यात. तशेंच संस्थेन 2.3 कोटींचे प्रकल्प मंजूर केल्यात. संस्थेक 10 पेटंट मंजूर जाल्यात. 4 पेटंट प्रसिद्ध जाल्यात, आनी 4 पेटंटा खातीर नोंदणी केल्ल्याचें डॉ. गोपाल मुगेराया हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
