भांगरभूंय | प्रतिनिधी
रोहीत मोंसेरातः मिरामार दर्यादेगेर निवळसाण मोहीम
भांगरभूंय । प्रतिनिधी
पणजीः गोंयांत सगळेच कडेन प्लास्टिकाची व्हड समस्या आसा. ताका लागून प्लास्टिकाचो वापर उणो करपाक जाय. आपणे स्वता जावन प्लास्टिकाचो वापर उणो करचो. पणजी म्हापालिके वतीन जाता तितलीं पावलां उखलतात, अशें पणजेचे महापौर रोहीत मोंसेरात हांणी सांगलें.
संवसारीक पर्यावरण दिसा निमतान म्हापालिके वतीन मिरामार दर्यादेगेर निवळसाण मोहीम हातांत घेतिल्ली. हे मोहिमेक सुरवात करपा वेळार मोंसेरात उलयताले.
निवळसाण मोहिमे खाला दर्यादेगे वयलो प्लास्टीक कोयर एकठांय केलो. हे मोहिमेंत 100 परस अदीक लोकांनी वांटो घेतिल्लो. हो मोहिमे खातीर एनसीसी कॅडेटान फुडाकार घेतला.
पणजी शारांतलो कोयर वाडचो न्हय हे खातीर म्हापालिकेचे निवळसाण कमगार कोयर एकठांय करतात. इतलेंच न्हय जाल्यार घराघरांतलो, हॉटेलांतलो तशेंच भौशीक सुवाते वयलोय कोयर वेळावेळार एकठांय करतात. ताका लागून पणजी शारांतलो कोयर नियंत्रणांत आसता, अशें मोंसेरात हांणी सांगलें.
हे निवळसाण मोहिमेंत सेन्सिबल अर्थ, सम्राट क्लब, एनसीसी कॅडेट, पुनीत सागर अभियान ह्या संस्थांनीय वांटो घेतिल्लो. आपले सरभोंवतणी कोयर उडोवं नाकात, तो कोयराच्या बल्लांत उडोवचो असो संदेश हे मोहिमे वरवीं दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
