भांगरभूंय | प्रतिनिधी
भांगरभूंय । प्रतिनिधी
पेडणेः मांद्रेचो आमदार जीत आरोलकारान बिरेस्तारा पार्से पंचायतीक भेट दिवन पंचायत वाठारांतल्या समस्यांची पंच वांगड्यां कडल्यान म्हायती घेतली. पंच वांगड्यांनी आपापल्या वॉर्डांतल्या समस्यांची वळेरी करून दिवची. जे प्रश्न आसात ते सुटावे करपाचो यत्न करपाचें उतर आरोलकारान तांका दिलें. ह्या वेळा लोकांनी आपल्यो समस्या आमदारा सामकार दवोरल्यो.
सध्या सरकारी नोकऱ्यो मेळप कुस्तार आसा. पेडण्यांतल्या थळाव्या तरणाट्यांक पर्यटन उद्देग वा हेर प्रकल्पांत आस्पावन घेवपाचो यत्न आपणे चलयल्यात. तरणाट्यांनी सरकारी नोकरी हे ध्येय म्हणून बाळगिनास्तना हेर मळानी काम करपा खातीर जाय ती कुशळटाय मेळोवपाचो यत्न करपाक जाय अशें आरोलकारान थळाव्या पत्रकारां कडेन उलयना सांगलें.
पार्सें पंचायतीन 5 हजार चौखण मीटर सुवात ताब्यांत घेवपाची प्रक्रिया सुरू केल्या. थंय मांद्रे मतदारसंघातल्या कोयराचो विलो लावपाचो प्रकल्प उबारपा विशीं पार्से पंचायत मंडळा कडेन आपणे उलोवणी केलीं. पंचायत मंडळान फुडाकार घेतल्यार हो प्रकल्प उबारपा खातीर संबंदीत सरकारी यंत्रणे वरवीं यत्न करपाचें आस्वासन आरोलकारान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
