भांगरभूंय | प्रतिनिधी
प्रवीण आर्लेकार ः पेडणें पुलीस स्टेशनाचे वतीन कलाकारांचो सत्कार
पेडणें ः पेडणें म्हाला खातीर म्हजे आमदारकीचे कारकिर्दींत पांच वर्सां भितर सुसज्ज अशें रवींद्र भवन उबारतले आनी कलाकारांक माची मेळोवन दितले अशें उतर आमदार प्रवीण आर्लेकार हांणी दिलें.
पेडणें पुलीस स्टेशनाचे वतीन म्हालांतल्या कांय कलाकारांचो सत्कार सुवाळो हालींच जालो. त्या वेळार ते मुखेल सोयरे ह्या नात्यान उलयताले.
ह्या वेळार पेडणें म्हाल पुलीस उपअधिक्षक सिद्धांत शिरोडकार, पेडणें जिल्हाधिकारी दीपक वायंगणकार, पुलीस निरिक्षक दत्ताराम राऊत, पुलीस निरिक्षक नवीन देसाय, येरादारी पुलीस निरिक्षक वीरेंद्र वेळुस्कार आदी मानेस्त हाजीर आसले.
ह्या वेळार ज्येश्ठ कलाकार, संगीततज्ञ भाई ऊर्फ दामोदर शेवडे, जयवंत मांजरेकार, संजय धुपकार, विष्णुबुवा शेटगांवकार, सुरेश बांदेकार, पी. सुर्यवंशी, श्रीकांत काननाईक, प्रेमनाथ धारगळकार, रघुनाथ पेडणेकार, सुधाकर माने, नारायण परब, धोंडू आरोलकार, प्रताप भेंडारकार ,सुशांती वस्त, सुरेश बांदेकार, अच्युत मांद्रेंकार, विलास परब, शशिकांत शेट्ये, मोहन पेडणेकार, विठ्ठल परब, सत्यवान पालेकार आदींचो सोयऱ्यांचे हस्तुकीं शाल, श्रीफळ आनी स्मरणचिन्न दिवन जाहीर सत्कार केलो.
सुरवातीक संजय धुपकार हांणी स्वातंत्र्याची महती सांगपी गीत सादर केलें. तांकां मोहन पेडणेकार आनी भाई शेवडे हांणी संगीत साथ केली. विष्णूबुवा शेटगांवकार हांणी स्वातंत्र्य दिसाचें म्हत्व सांगलें.
पेडणें म्हालांतल्या कलाकारांनी कला जिवंत दवरल्या. अशा कलाकारांक माची मेळची हे खातीर आमदारकेच्या पांच वर्सांचे कारकिर्दींत पेडणें म्हालांत रवींद्र भवन उबारतले अशें प्रवीण आर्लेकार हांणी सांगलें.
ह्या वेळार विनी हुम्रस्कार आनी प्रियांका राऊत आदीनी सोयऱ्यांक फुलांतुरो दिवन येवकार दिलो. भक्ती धुपकार हांणी सोयऱ्यांची वळख करून दिली आनी कार्यावळीचें सुत्रसंचालन केलें. सुरवातीक पुलीस निरिक्षक दत्ताराम राऊत हांचे हस्तुकीं बावटो हुबयलो. पुलीस उपनिरिक्षक विवेकल हळर्णकार हांणी परेडीचें फुडारपण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
