भांगरभूंय | प्रतिनिधी
परतून घोळ जाल्यार वतले न्यायालयांतः मायकल लोबो
भांगरभूंय I प्रतिनिधी
पणजी : राज्य वेंचणूक आयोगान तयार केल्ले प्रभाग फेररचणुकेंत हस्तक्षेप करपाचें काम सरकारान सुरू केलां. हाका लागून परतून घोळ जावपा सयत प्रकरण न्यायालयांत वचपाची शक्यताय विरोधी पक्ष फुडारी मायकल लोबो हांणी उक्तायल्या. हस्तक्षेपा विशीं आपूण मुख्यमंत्री डॉ. प्रमोद सावंत हांची भेट घेतलो. ते भायर राज्य वेंचणूक आयोगाक पत्र बरयतलो, अशें तांणी सांगलें.
काँग्रेस विधीमंडळ पंगडाची सोमारा बसका जाली. बसके उपरांत पत्रकार परिशदेंत मायकल लोबो हांणी ही म्हायती दिली.
ह्या वेळार आमदार दिगंबर कामत, डिलायला लोबो, प्रदेश काँग्रेस अध्यक्ष अमित पाटकार आनी हेर आमदार हाजीर आसले.
नगरपालिका वेंचणुकेच्या प्रभाग रचणुकेंत घोळ जाल्लो. आतां पंचायतींच्या प्रभाग फेररचणुकेंत घोळ जावपाची शक्यताय आसा. लोकां कडल्यान सुचोवण्यो मागोवन वेंचणूक आयोगान योग्य तरेन प्रभाग फेररचणुकेची प्रक्रिया केल्या. आतां सरकारा कडेन फायल पावले उपरांत हस्तक्षेपाक सुरवात जाल्या, असो आरोप तांणी केलो. पालिका वेंचणुकेच्या प्रभाग फेररचणुकेंत सर्वोच्च न्यायालया कडल्यान सरकाराक चाबूक बशिल्लो. आतां लेगीत ही प्रक्रिया न्यायालयांत पावपाची चिन्नां आसात.
वर्स जालें तरी लाडली लक्ष्मीचे पयशें मेळनात
गृहआधार तशेंच लाडली लक्ष्मी येवजणेचे पयशे लाबार्थ्यांक मेळनात. चलयेचे लग्न जावन भुरगे जाले तरी लाडली लक्ष्मीचे पयशें मेळूंक नात. विधानसभा वेंचणूक जावन, आचारसंहिता सोंपली. अजून मेरेन कल्याणकारी येवजण्यांचे पयशें लाबार्थ्यांक मेळूंक नात. सरकाराच्या निष्क्रीयतेचो हो परिणाम आसा, अशें मायकल लोबो हांणी म्हणलां. पर्यटन वेवसायाची ऑनलायन नोंदणी सुरू जाल्या. पर्यटना विशीं नवे निर्णय जावपाक जाय. परत परत त्योच घोशणा जावपाक जायना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
