भांगरभूंय | प्रतिनिधी
फोंडें, प्रतिनिधी ः सरकारी नोकरी दिवपाचे हांयस दाखोवन फटोवपी प्रकरणांनी दिसांन दीस बरीच वाड जायत आसा. ह्या प्रकरणांनी सद्दां नवीं नांवां मुखार येत आसात. आयज सकाळीं म्हाड्डोळ पुलिसांनी सरकारी नोकरेचें हांयस दाखोवन ५ लाखांची तोपी घाल्ले खातीर संदीप जगन्नाथ परब हाका अटक केल्या.
मजगतीं, मेळिल्ले म्हायती प्रमाण विशाल गांवकार (33, खांडोळें- माशेल) हाका संदीप परब (तारीवाडो- माशेल) हाणें रानां खात्यांत एलडीसी पदाचेर भरती करपाचें उतर दिल्लें. नोकरे खातीर 14 लाख रुपया दिवचे पडटले अशेंय ताणें सांगिल्लें. मजगतीं, फेब्रुवारींत कागाळदार विशाल गांवकार हाणेम संदीपाक पांच लाख रुपया दिले. बरोच कळाव जाले उपरांत लेगीत नोकरी मेळूंक ना आनी पयशेय गेले ह्या भंयान विशालान संदीपा आड कागाळ केली.
मजगतीं, ही रक्कम संदीपान दीपश्री कडेन दिल्ली, अशेंय कळटा. सध्या म्हाड्डोळ पुलिसांनी संदीप परब हाका कागाळीच्या आदाराचेर अटक करून फटोवपाच्या कलमा खाला गुन्यांव नोंद केला. आनी ताची चवकशी चालू आसा.
संदीप परब हाचो संबंद दिपश्री सावंत प्रकरणा कडेन आसा आनी ताचे आदीं ताणें दिपश्री आड म्हाड्डोळ पुलीस स्टेशनांत 44 जाणांक सुमार 4 कोटी रुपयांची तोपी घाल्ल्याची कागाळ केल्ली. दीपश्री खातीर मध्यस्थ म्हणूनय तो वावुरतालो. म्हाड्डोळ पुलिशेंत दाखल केल्ले कागाळी प्रमाण, दीपश्री सावंत हिणें संदीपाच्या मजतीन 44 जाणांक कनिश्ट लिपिक, तंत्रीक सहाय्यक, स्टेनोग्राफर, अबकारी निरिक्षक, कनिश्ट अभियंते, एमटीएस आनी हेर पदां अशें वेगवेगळ्या सरकारी खात्यांत नोकरी दिवपाचे हांयस दाखयल्लें. तशेंच, चडांत चड 20 लाख रुपया, जाल्यार उण्यांत उणी 3 लाख रुपया रक्कम घेतिल्ल्याचे कागाळींत नमूद केलां.
मजगतीं, जांणी तांचे मार्फत पयशे दिवन नोकरी मेळयल्या, तांची नांवां सोदून चवकशी करची अशी मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
