भांगरभूंय | प्रतिनिधी
दुबाविताक अटक
म्हापशें, प्रतिनिधी ः नादोड्यां संगम बारांत शुल्लक कारणा वेल्यान सुरी हल्लो जावपाचो प्रकार घडलो. ह्या हल्ल्यांत सर्वेश संतोष बागकार (34, कोलवाळे) हो तरणाटो जखमी जालो. पुलिसांनी दुबावीत नीरज भीमराव हरगापुरे (38, नादोड्यां) हाका अटक केल्या.
शुक्रारा 7 तारखेक रातच्या 11.50 वरांचेर ही घडणूक घडली. दुबावीत नीरज आनी जखमी सर्वेश दोगूय संगम बारांत बशिल्ले. नीरजान सर्वेशाक तूं आमच्या गांवांत कित्याक आयला, अशें विचारून ताचे वांगडा बाचाबाची सुरु केली. कांय वेळान दोगांय मदीं झगडीं जालीं, जी हल्ल्याचेर पावली. उपरांत दुबावीत नीरजान सर्वेशाचेर सुरी घेवन हल्लो केलो. सर्वेशाच्या नाक, हात आनी कुडीक हेर कडेन घावे जाल्यात. ताका एम्ब्युलन्सींतल्यान म्हपशें जिल्लो हॉस्पिटलांत व्हेलो. उपरांत फुडल्या उपचारा खातीर जीएमसींत धाडलो. जीएमसींत ताचेर उपचार चलतात.
जखमी सर्वेशाचे कागाळी उपरांत, शेनवारा सकाळीं पुलिसांनी दुबाविता आड जीवघेणो हल्लो प्रकरणांत गुन्यांव नोंद केलो. दुबावित नीरजाक अटक केल्या. पुलीस निरिक्षक विजय राणे हांच्या मार्गदर्शना खाला उपनिरिक्षक विष्णु जाधव फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
