भांगरभूंय | प्रतिनिधी
भाजपाचे अल्पसंख्याक फुडारी फ्रान्सीस सिल्वेरा हांचो उलो
म्हापशें, प्रतिनिधी ः गोंय हें सर्वधर्म समभावाचो संदेश दिवपी राज्य. हांगा चडशे लोक सगळ्या धर्मांचो आदर करतात. दरेकल्यान दुसर्याच्यो धर्मीक भावना दुखावच्यो नात हाची जतनाय घेवची, असो उलो भाजपाचे अल्पसंख्याक फुडारी फ्रान्सीस सिल्वेरा हांणी मारलो. म्हापश्यां पक्ष कार्यालयांत आयोजीत पत्रकार परिशदेंत ते उलयताले. ह्या वेळार भाजपाचे प्रवक्ते ग्लेन टिकलो, जिल्हो मंडळ उपाध्यक्ष फ्रँकी कार्व्हालो आनी झेवियर ग्रासियस हाजीर आशिल्ले.
खंयच्याय धर्माच्या व्यक्तीन धर्मीक भावना दुखोवपाचो यत्न केल्यार ह्यान फुडें संबंधितांचेर कायदेशीर कारवाय जावची. मुख्यमंत्र्यांनी धर्मीक भावना दुखोवप्यां आड कारवाय करपाची शिटकावणी दिल्या. कांय प्रकरणां कारणा शिवाय दुस्मानकाय वा नागरिकां मदीं संभ्रम निर्माण करपी थारतात, अशें सिल्वेरा हांणी म्हणलें.
गोंयांत सगळ्या जाती- धर्माचे लोक सुशेगाद रावतात. आदल्या काळांत कांय क्रिस्तांव धर्मगुरुंनी हेरां विशीं आक्षेपार्ह विधानां केलीं. ताची दखल घेवन आर्चबिशपांनी धर्मगुरुंक धर्मीक भावना दुखोवच्यो न्हय अशी सुचोवणी केली. ह्या विधानाक भाजपाच्या अल्पसंख्याक फुडार्यांनी येवकार दिलो.
चर्चींत धर्मगुरू सदांच गोंयकारांच्या कल्याणा खातीर प्रार्थना करतात. तशी भावार्थान मागणी करता. दरेकल्यान लोकांच्या भावनांचो आदर करचो. कोणायकूय मजत करपी व्यक्ती म्हळ्यार देव आसता, अशेंय सिल्वेरा हांणी म्हणलें.
ग्लेन टिकलो हांणी सांगलें : गोंयांत सगळ्या धर्माचे लोक एकवटान रावतात. एकामेकाच्या परबांनी, उत्सवांनी वांटेकार जातात. पूण लोकां मदीं संभ्रम निर्माण करपी कांय विधानां थारतात. ताका लागून लोकभावना दुखावतली अशी वक्तव्यां कोणेंच करचीं न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
