भांगरभूंय | प्रतिनिधी
म्हजें मत
राज्य म्हामार्ग क्रमांक 1- दिवचल बगल चार पदरी रस्त्याचें 6 जून 2024 ह्या दिसा उक्तावण जालें. सुमार 4.5 किलोमिटर लांबायेचो हो रस्तो बोर्डें- व्हाळशे हांगा दिवचल शाराक बगल दिवन थेट सरवणां भायर सरता. जळीं स्थळीं वाट दाखोवपी पाटयो लायल्यो. कोंकणी गोंयची राजभास देखून गोंयभर वाट दाखोवपी पाटयांचेर कोंकणी भाशेंत म्हायती बरोवपाची वेवस्था गोंय सरकारान केल्या. कित्याक लागून खबर ना, पूण हे वाटेर कोंकणी पाटयो लागल्यो नात. एखादे वेळार चुकून जालां आसतलें, अशें समजुया. तशेंच ताकतिकेन, वाट दाखोवपी पाटयेर ‘मनोहर आंतरराष्ट्रीय विमानतळ’ बरोवपाच्या जाग्यार ‘मनोहर आंतराष्ट्रीय विमानतळ’ अशें बरयलां.
जाल्ली चूक हावें त्या भागाचे नगरसेवक (आतांचे नगराध्यक्ष) बाब विजयकुमार नाटेकार तशेंच दिवचलचे आमदार दोतोर चंद्रकांत शेटये अश्या दोगांयचेय नदरेक हाडून दिली. दोगांयनी हातूंत लक्ष घालून सुदारणा करपाचें उतर दिलें.
बाब विजयकुमार नाटेकार तर ‘दोन म्हयन्यां भितर दुरुस्ती करतां.’ अशी उर्बेभरीत जाप दिली. हावें खेळीमेळींच्या उतरांनी ताका ‘एक वर्सा भितर दुरुस्ती करुन दाखयल्यार तुजें कवतूक’ अशी जाप दिली. दर एक म्हयनो सोंपतकच हांव मुजरत नाटेकारबाबाक दिल्ल्या उतराची याद करून दितालों.
आयज वर्स जालें. तारूं आसा थंयच आसा. सुदारणा जातली अशें दिसतालें, पूण ती जायत अशें दिसना. गोंयांत खूब कडेन चुकीच्यो बरयिल्ल्यो अगणीत पाटयो आसात. दीस गेले, म्हयने गेले आनी वर्सां गेलीं. कोणाकूच पडिल्लें ना.
‘बाबी’- ‘शाबी’ पोक देफेरेंस अशें म्हणून ओग्गी रावपाचें.
अरुण साळकार, दिवचल
75074 78364
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
