भांगरभूंय | प्रतिनिधी
भांगरभूंय । प्रतिनिधी
मुरगांवः दाबोळी विमानतळा वयली माल (कार्गो) येरादारी मोपा विमानतळाचेर व्हरपा खातीर जीएमआर कंपनीन केंद्र आनी राज्यांतल्या भाजपा सरकाराचेर चेंपण हाडलां. ऍर इंडिया आनी कतार ऍरवेसाचो दाबोळींतलो कार्गो मोपा विमानतळार व्हरपाच्यो हालचाली सुरू जाल्यात अशें गोंय प्रदेश काँग्रेस समितीचो वांगडी एल्वीस गोम्स हाणे बिरेस्तारा वास्कोंत एके पत्रकार परिशदेंत सांगलें. ही गजाल खरी नासल्यार भाजपा सरकारान दाबोळी वयलो कार्गो तशेंच प्रवासी येरादारी आसा तशीच उरतली अशें जाहीर करचें अशें ताणे मागलां.
मोपाक लागून दाबोळी विमानतळ बंद करतले हाची भिरांत सुरवेक सावन दक्षीण गोंयांतले हॉटेल वेवसायीक आनी पर्यटन उद्देगा कडेन संबंदीत आशिल्ल्यांक आशिल्ली. तातूंत दाबोळीचो कार्गो मोपाक व्हरपाचें कारस्थान चलिल्ल्यान लव्हू लव्हू प्रवासी येरादीर पुरायपणान मोपाक व्हरतले अशें तांकां आतां दिसपाक लागला. लोकांच्या मनांतलो दुबाव पयस करपा खातीर सरकारान जाात तितल्या बेगीन खुलास करपाची गरज आसा, अशें गोम्सान सांगलें.
मोपा जालो तरी दाबोळीचेर कसलोच परिणाम जावचो ना अशें येरादारी मंत्री माविन गुदिन्हो सांगत आयला. ताणे तशेंच मुरगांव तालुक्यांतले आमदार संकल्प आमोणकार, कृष्णा साळकार आनी सरकाराक तेंको दिवपी आन्तोन वास हांणी दक्षीण गोंयांतल्या लोकांक खरें किदें तें सांगचें अशें आव्हान गोम्स हाणे तांकां दिलां. दाबोळीक कुशीक सारून कार्गो वांगडाच देशातंर्गत आनी आंतरराष्ट्रीय प्रवासी येरादरी मोपा विमानतळार व्हरपाचे यत्न जीएमआर कंपनीन सध्या चलयल्यात. भाजपा सरकार व्हड उद्देगपतींच्या तालार नाचपी सरकार आशिल्ल्यान जीएमआर कंपनीच्या धनयाक खोशी करपा खातीर तें तांकां जाय ते करपाक फाटीं-फुडें पळोवचें ना असो दावो ताणे केला.
जीएमआर कंपनीन मोपा कुशीकच्या नागझऱ वाठारांत व्हड जमीन विकती घेतल्या. राज्य सरकारान मोपा विमानतळ मोपा पंचायत वाठारांतल्या काडून तांचे खातीर खासा पीडीए स्थापन केल्या. केंद्रीय नागरी विमान येरादारी मंत्रालयान ऍर इंडिया आनी कतार ऍरवेस कंपनीक तांची कार्गो येरादारी मोपा वयल्यान करपाक सांगलां. व्हो दोन विमान कंपन्यांनी आपली कार्गो येरादारी मोपाच्यान सुरू केल्यार हेर कंपन्योय मोपा वचपाक लागतल्यो. दाबोळी वयलो वेव्हार बंद पडल्यार मुरगांव तालुक्या वांगडा, साश्ट, केंपें, काणकोण, सागें आनी धारबांदोडें तालुक्यांक अर्थीक फटको बसतलो अशें एल्वीस गोम्सान सांगलें. पत्रकार परिशदेक वास्को गट काँग्रेस अध्यक्ष मेलवीन फर्नांडीस, कुठ्ठाळी गट काँग्रेस अध्यक्ष पीटर डिसोझा आनी नियाजी शेख हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
