भांगरभूंय | प्रतिनिधी
रेवारी-हरयाणा जाल्ले सिनीयर राष्ट्रीय लगोरी सर्तींत गोंयच्या चले आनी चलयांच्या पंगडान जबरदस्त प्रदर्शन केलें.
चलयाच्या पंगडान कांश्या पदक जिखलें, जाल्यार चल्यांच्या पंगडाक फायनलींत हार घेवची पडली, ताका लागून चल्यांच्या पंगडाक रुप्या पदक फावो जालें.
चल्याच्या पंगडान सर्तींत झणझणीत प्रदर्शन केल्लें. अ गटांत ताणें बिहाराक 2-1 असो हारयलो. ते उपरांत अरुणाचल प्रदेशाक लेगीत 2-1 ह्याच फरकान हारयलो. जैताची धांव कायम राखतना तिसरे मॅचींत कर्नाटका आड 2-0 फरकान जैत जोडलें. चवथे मॅचींत हिमाचल प्रदेशाक 2-0 हारयलो. गटांतले आपले निमाणे मॅचींत दिल्ली आड 2-0 जैत जोडलें. मुखेली सार्थक कवळेंकार, विहान नाबर, उत्तेज गावडे, अमोघ तिंबे हाणें बरें प्रदर्शन केलें.
सेगीत पांच मॅची जिखल्या उपरांत क्वॉर्टरफायनलींत ताणें राजस्थानाक 2-1 अशा फरकान हारयलो. जाल्यार सेमी फायनलींत आसामा आड 2-0 अशें जैत जोडलें. पूण, गोंयची जैताची धांव फायनलींत थांबली. फायनलींत ताका महाराष्ट्र पंगडा कडल्यान 1-2 अशी हार घेवची पडली. अंदूं सर्तीची ही धावी अावृत्ती आशिल्ली. रुप्या पदक आसाम आनी पुडुचेरी ह्या पंगडांक कांश्या पदक विभागून फावो जालें.
बायलांच्या गटांतले क्वॉर्टरफायनलींत गोंय पंगडान बिहाराक 2-1 हारोवन सेमी फायनलींत सुवात मेळयली. पूण, सेमी फायनलींत ताका आसामा कडल्यान 1-2 हार घेवची पडली. ह्या गटांत हरयाणा पंगडाक भांगरा पदक फावो जालें, आसामाक रुपें जाल्यार गोंय आनी झारखंड ह्या पंगडांक कांश्या पदक विभागून दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
