भांगरभूंय | प्रतिनिधी
फोंडें: फोंडें येरादारी पुलीस सद्या ‘ड्रंक अॅण्ड ड्रायव्ह’ करपी वाहन चालकां आड खर कारवाय कारीत आसात. येरादारी पुलीस निरिक्षक कृष्णा सिनारी हांच्या मार्गदर्शना खाला विवीध सुवातींनी रस्त्यार तैनात रावन कारवाय करीत आसात. फाटल्या तीन दिसांत येरादारी पुलिसांनी वट्ट 17 सोरो पियेल्ल्या चालकां आड गुन्यांव नोंद केल्यात.
गोंयांत अपघाताची संख्या दिसानदीस वाडत आशिल्ल्यान दीस-रात सोरो पियेवपी चालकांची चांचणी अल्कोमिटराच्या सहाय्यान करतात. येरादारी पुलिसांनी मंगळारा पांच, बुधवारा सात जाल्यार बिरेस्तारा सांजवेळ मेरेन पांच सोरो पियेल्ल्या चालकां आड गुन्यांव नोंद केले.
बिरेस्तारा खूबशा सुवातींनी पुलीस कर्मचाऱ्यांनी अल्कोमिटराच्या सहाय्यान वाहन चालकांची तपासणी करपाची मोहीम सुरू आशिल्ली. फर्मागुडयेर निरिक्षक कृष्णा सिनारी, उपनिरिक्षक सत्यवान गांवकार, सहाय्यक उपनिरिक्षक मोहन हळर्णकार, निलेश गावडे, रजत मडकयकार, रामा दमेकार आनी उल्हास नायक हांणी कारवाय केली.
फोंडें येरादारी पुलिसां कडेन फाटल्या कितल्याशाच वर्सां पयलीं वट्ट 8 अल्कोमिटर दिल्ले. पूण कालांतरान तातूंतले सात अल्कोमिटर पेड्डेर जाले. ताका लागून येरादारी पुलिसांक एकूच अल्कोमिटर आशिल्ल्यान ताचेरूच निंबून रावचें पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
