भांगरभूंय | प्रतिनिधी
आरोपांक कसलोच आदार ना : सर्वोच्च न्यायालय
जामनगर : रिलायन्स इंडस्ट्रीज लिमिटेडाचो तेंको आशिल्ल्या ग्रीन्स झुओलॉजिकल रेस्क्यू अँड रिहॅबिलिटेशन सेंटर सोसायटी वरवीं (GZRRC) चलपी गुजरातांतल्या जामनगर हांगाच्या प्राणीसंग्रहालया आड दाखल जाल्ली जनहित याचिका सर्वोच्च न्यायालयान भायर मारल्या. जीझॅडआरआरसी आड लायिल्ले आरोप बातम्यांचेर आदारून आसात. तशेंच तांकां कसलोच आदार ना, अशें निरीक्षण सर्वोच्च न्यायालयान नोंदयलां.
300 एकर जमनी वयलें हें संवसारांतलें व्हडलें प्राणीसंग्रहालय. संवसारभरांतले प्राणी थंय आसतले. तें स्थापन करपाक आव्हान दिवपी जनहीत याचिका एका कार्यकर्त्यान दाखल केल्ली. ताणें जीझॅडआरआरसीन भारतांतल्यान आनी परदेशांतल्यान जनावरां मेळोवपाचेर बंदी घालची तशेंच जीझॅडआरसीच्याे कार्यावळी आनी वेवस्थापनाची चवकशी करपा खातीर एसआयटी स्थापन करची अशी मागणी केली.
जीझॅडआरआरसीन प्राणी हस्तांतरीत करपाक तशेंच हेर गजाली केल्यात, त्यो सगल्यो कायदेशीर आसात. ताचेर आमी समाधानी आसात, अशें न्यायालयान म्हणलां. जीझॅडआरआरसीन मुळाव्यो सुविधा, दोतोर, जीवशास्त्रज्ञ, प्राणीशास्त्रज्ञ आनी हेर तज्ञां विशीं जो अहवाल सादर केला, ताची नोंद घेवन ही संस्था कायद्याचे नदरेन नेमांक पाळो दिता, अशेंय न्यायालयान म्हणलां.
जनावरांचें हस्तांतरण आनी बोटींचेर याचिकेंत प्रस्न चिन्न उबें केल्लें. जीझॅडआरआरसीच्या अणभव आनी क्षमते विशीं याचिकेंत प्रस्न केल्ले. जीझॅडआरआरसीन आपलो सविस्तर प्रतिसाद सादर केले उपरांत न्यायालयान 16 ऑगस्टाक हो प्रस्न आयकून याचिकेंत उक्तायिल्ल्या सगल्या आक्षेपां सयत याचिका न्हयकारली.
प्राण्यांच्या कल्याणा खातीर आमचें काम चालू दवरतले. जीझॅडआरआरसी जनावरांचें कल्याण, सोडवणूक, पुनर्वसन आनी संवर्धन तशेंच संवसारीक दर्ज्याची जतनाय घेवपाक बांदील आसात. कठीण परिस्थितींतल्यान सोडोवपाची गरज आशिल्ल्या जनावरांक आदार दिवपाक जाय, अशें जीझॅडआरआरसीचे संघटणेचे मुखेली धनराज नाथवाणी हांणी सांगलें.
प्राण्यांचे शास्त्रीय उद्यान स्थापन करतले
आमी प्राण्यांचें एक शास्त्रीय उद्यान स्थापन करतले, जें मुळाव्या शिक्षणीक उद्देशान भौशीक प्रदर्शनां खातीर उक्तें आसतलें जाल्यार ताचीं उरिल्लीं सुविधा प्राणी कल्याणा खातीर सोडवणूक केंद्रां म्हणून काम करतली. फक्त भारतांतल्यान न्हय जाल्यार संवसारभरांतल्या जनावरांचें कल्याण, सोडवणूक, पुनर्वसन आनी संवर्धन ह्या उद्देशान सोडवणुकेची गरज आशिल्ल्या जनावरां खातीर वावर जातलो. आमची संस्था ना फायदो तत्वाचेर चलपी संस्था आसा, अशें जीझॅडआरआरसीन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
