भांगरभूंय | प्रतिनिधी
19 वर्सां पिराये सकयले विनू मांकड वन डे क्रिकेट सर्तींतले लीग पांवड्या वयले मॅचींत गोंय पंगडाक राजस्थाना कडल्यान 55 धांवड्यांनी हार घेवची पडली.
अंबी पुणेच्या डी व्हाय पाटील अकादमी मैदानाचेर जाल्ले मॅचींत राजस्थानाचो एम चौधरी आनी करण सिंग पर्जळ्ळे. चौधरीन 119 धांवड्यांची खेळी केली, जाल्यार करणान 85 धांवड्यांचें योगदान दिलें.
पयलीं बॅटींग करतना राजस्थानान 44 ओव्हरींनी 279 धांवड्यांचो दोंगर उबारलो. गोंया वतीन चित्तम देवनकुमार येसस्वी बॉलर थारलो. ताणें पांच विकेटी घेतल्यो. ताचे खेरीत पुंडलीक नायकान तीन बॅट्समनांक बाद केले.
मोखीचो फाटलाव करतना गोंयाक 45 ओव्हरींनी 7 विकेटी वगडावन 224 धांवड्यो करप शक्य जाल्यो. आर्यन नार्वेंकारान 52 आनी देवनान 46 धांवड्यो केल्यो. पूण, तांकां आपल्या पंगडाक मोखी मेरेन व्हरप शक्य जालें ना.
थोडे भितर धांवतकटोः राजस्थान, 44 ओव्हरींनी 279 धांवड्यो ( करण सिंग 85, एम चौधरी 119 धांवड्यो, पुंडलीक नायक 3-52, चित्तम देवनकुमार 5-39) जैत आड गोंय, 45 ओव्हरींनी 7 बाद 224 धांवड्यो (चित्तम देवनकुमार 46, आर्यन नार्वेंकार 52, सनथ नेवगी आनी दीप कासवणकार दरेकी 22, पुंडलीक नायक नाबाद 32 धांवड्यो, ए मलिक 2-37).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
