भांगरभूंय | प्रतिनिधी
-गोंया सारक्या ल्हान राज्या खातीर ही आंकडेवारी हुस्क्याचीं
– 10 वर्सांतले आंकडेवारींतल्यान स्पश्ट
– राष्ट्रीय गुन्यांव नोंदणी विभागाचो अहवाल
पणजी : गोंयांत फाटल्या कांय वर्सांत आत्महत्या करपाचें प्रमाण वाडत आसा. विवीध कारणांक लागून राज्यांत 2011 ते 2021 ह्या 10 वर्सांत 3,151 व्यक्तींनी आत्महत्या केल्या. हाची सरासरी काडल्यार दर म्हयन्याक सुमार 26 व्यक्तींनी आपलो जीव वगडायला. गोंया सारक्या ल्हान राज्या खातीर ही आंकडेवारी हुस्क्याची आसा.
राष्ट्रीय गुन्यांव नोंदणी विभागाच्या (एनसीआरबी) आंकडेवारी प्रमाण, राज्यांत दर लाख लोकसंख्ये फाटल्यान आत्महत्या करप्यांचें प्रमाण लेगीत चड आसा. 2019 त 1 लाख लोकसंख्येंत आत्महत्येचें प्रमाण 16.9 टक्के आशिल्लें. 2020 त हें प्रमाण 19.90 टक्के जाल्यार 2021 त 20.80 टक्के इतले जालें. राज्यांत दर लाख मनशां फाटल्यान आत्महत्येचें प्रमाण राष्ट्रीय सरासरी परस चड जाता.
एनसीआरबीच्या अहवालांत आत्महत्या करपा फाटल्यान जायतीं कारणां स्पश्ट केल्यात. हातूंत मानसीक ताण, निरशेवणी, वेवसायीक वा फुडारांतल्यो समस्या, एकलेपणां, छळ, कुटुंबीक समस्या, अर्थीक लुकसाण, सोऱ्याचे व्येसन, दीर्घ काळाचें दुयेंस हांचो आस्पाव आसा.
आयज 10 सप्टेंबर जागतीक आत्महत्या प्रतिबंध दीस. आत्महत्या आडावपाक आत्महतेचो विचार करपी लोकांची लक्षणां वेळार वळखून तातूंत हस्तक्षेप करप गरजेचें. तांचे कडेन उलयल्यार वा तांकां स्वताच्यो भावना मेकळो करपाची संद दिल्यार, तांच्या मनांतल्यान आत्महतेचो विचार ना जावपाक शकता, अशी म्हायती गोंय मेडिकल म्हाविद्यालय आनी हॉस्पिटलाच्या प्रतिबंधात्मक आनी सामाजीक वखदा विभागाचे सहाय्यक प्राध्यापक डॉ. अमीत डायस हांणी आमच्या प्रतिनिधी कडेन उलयतना दिली.
आमी सगले जाण कठीण काळांतल्यान वा दुख्खांतल्यान वतात. पूण हाचे कडेन सकारात्मक नदरेन पळोवपाक जाय. एक दीस हो अणभव आमकां घटमूट करपाक निश्चीत मजत करतलो, अशी आस्त दवरपाक जाय. कुटुंब, समुदाया कडेन जोडिल्ले उरल्यार आनी भलायकी सेवा सहज उपलब्ध जाल्यार आत्महत्येचो विचार आनी वर्तन उणें जावपाक शकता, अशेंय डॉ. डायस हांणी म्हणलें.
समाजांत आत्महत्येक मिथक वा कलंक समजतात. हे विशीं कोणूच उक्तेंपणान उलयनात. पूण जर आमी ह्यो गजाली उक्त्यो कल्यो जाल्यार आत्महतेचो विचार करपी व्यक्तीच्या मनांत आस्त जागृत जावपाक शकता.
– डॉ. अमीत डायस, सहाय्यक प्राध्यापक, सामाजीक वखदां विभाग, गोमेकॉ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
