भांगरभूंय | प्रतिनिधी
फलोत्पादान म्हामंडळाच्या दुकानांनी 75 रु. कील
फुडले 15 दीस मोल सकयल देंवपाची शक्यताय उणी: प्रेमेंद्र शेट
पणजी: गोंयांतल्या बाजारपेठांनी टमाटान शंबरी हुपिल्ली आसली तरी गोंय फलोत्पादन म्हामंळाच्या दुकानांनी मात अजुनूय 75 रुपया कील प्रमाण टमाट विकतात. हाचे परस उण्या मोलान टमाट विकप फलोत्पादन म्हामंडळाक परवडपाचें ना. आनीक फुडले 15 दीस तरी टमाटाचें मोल सकयल देंवपाची शक्यताय ना अशें फलोत्पादन म्हामंडळाचे अध्यक्ष आनी मयेंचे आमदार प्रेमेंद्र शेट हांणी सांगलें.
गोंयांत तशेंच गोंया भायल्या राज्यांनी पडपी आडवेळ्या पावसाक लागून व्हड प्रमाणांत टमाट कुसला. ताका लागून गोंयांत जो बेळगांव सावन टमाट आयत जातालो ताचेर हाचो परिणाम जाला. सद्या टमाट कुशिल्ल्यान आयातीचेर हाचो परिणाम जाला. ताका लागून टमाट खूब म्हारग जाला. तरी लेगीत फलोत्पादन म्हामंडळा वतीन गोंयांतल्या लोकांक जाता तितल्या उण्या मोलान टमाट दिवपाचो यत्न जाता. 75 रुपया किला परस उण्या मोलान टमाट विकप परवडपाचें ना. टमाटाचे नवे पीक येसर म्हारगूच टमाट खावचो पडटलो अशें प्रेमेंद्र शेट हांणी सांगलें.
टमाट हो रांदचेकुडींतलो मुखेल घटक. गोंयांत टमाटाचे पीक जायनाशिल्ल्यान व्हड प्रमाणांत टमाट आयात करचो पडटा. घरांत तशेंच हॉटेलांनी टमाटाक व्हड मागणी आसता. ताका लागून टमाटाची दिसादीस मागणी वाडत आसता. पूण फाटले कांय दीस पडपी आडवेळ्या पावसाक लागून बेळगांव सयत खूबशा वाठारांनी टमाटाचें पीक कुसलां. ताका लागून टमाटाचे मोल मळबाक तेंकला. आतां दुसरें पीक येसर टमाटाचें मोल देंवप कठीण आसा. तेच प्रमाण गिरायकांकूय थोडी कळ सोंसची पडटली अशें ह्या वेळार प्रेमेंद्र शेट हांणी सांगलें.
म्हापशें मार्केटांतले भाजयेचे दर
मजगतीं, आमचो म्हापशें प्रतिनिधी कळयता ते प्रमाण, सद्या पडपी आडवेळ्या पावसाचो चड फटको टमाट आनी वालपापडीच्या पिकाक बसला. बेळगांव आनी कोल्हापूर जिल्ह्यांत ह्या पावसान नेट धरला. ताका लागून टमाट आनी वालपापडीचे मोल दुपेटीन वाडलां.
मॉन्सून मेरेन हो पावस असोच उरल्यार भाजयांचीं मोलां वाडपाची शक्यताय भाजी विक्रेत्यांनी उक्तायली. तांतीं आनी चिकानाचेंय मोल वाडलां. फाटल्या सप्तकाचे तुळेन ह्या वेळार हेर भाजयांचींय मोलां वाडल्यांत.
अंदूं पयलेच फावट मे म्हयन्यांत आडवेळ्या पावसान नेट धरला. पावसाक लागून शेतकारांचे पीक शेतांत पेड्डेर जावंक लागलां. ताका लागून शेतकाराक सैमीक आपत्तीक तोंड दिवचें पडटा.
————-
बॉक्स
किला फाटल्यान भाजयांचें मोल
कांदोः 20
बटाटः 30
टमाटः 100
कोबीः 30
फ्लावरः 40
भेंडोः 60
गाजरः 35
गवारः 35
वालपापडीः 130
मिरसांगः 60
काकडीः 40
दुदीः 30
कोंकण दुदीः 60
वालः 60
लसूणः 70
आलेंः 50
ओली कोतमीरः 20
वायंगेंः 50
डब्बू मिरसांगः 80
चिटकीः 50
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
