भांगरभूंय | प्रतिनिधी
इंडीयन प्रिमीयर लिगेचे 2022 (आयपीएल) पयले क्वॉलिफायरांत गुजरात टायटन्सान राजस्थान रॉयल्साक 7 विकेटींनी हारोवन फायनलींतली सुवात निश्चीत केली. राजस्थान रॉयल्सान 189 धांवड्यांची मोख दिल्ली. मोखीचो फाटलाव करतना गुजरातान 19.3 ओव्हरींनी 3 बाद 191 धांवड्यो करून जैत जोडलें.डॅव्हीड मिलर आनी मुखेली हार्दिक पांड्या हांणी उत्कृश्ठ बॅटींग केली. दोगां मदीं 52 बॉलांनी 81 धांवड्यांची नाबाद भागिदारी जाली.
ते आदीं राजस्थान रॉयल्सान टॉस हारल्या उपरांत पयलीं बॅटींग करतना 20 ओव्हरींनी 6 विकेटी वगडावन 188 धांवड्यो केल्यो.
राजस्थाना वतीन परतून एकदां जोस बटलरान विस्फोटक बॅटींग केली. ताणें फक्त 56 बॉलांनी 89 धांवड्यांची खेळी केली. हातूंत 12 चवक्यांचो आनी दोन सक्यांचो आस्पाव आशिल्लो. गुजराता वतीन मोहम्मद शमी, साई किशोर, हार्दिक पांड्या आनी यश दयाल हांकां दरेकी एक विकेट फावो जाली.
राशिद खानान उत्कृश्ठ बॉलींग केली. ताणें चार ओव्हरींनी फक्त 15 धांवड्यो दिल्यो. ताका विकेट मेळूंक नासली तरी ताणें राजस्थानाच्या बॅट्समनांक बांदून दवरले.
राजस्थानाची सुरवात बरी जाली ना. दुसरे ओव्हरींत यश दयाल राजस्थानाक धपको दिलो. ताणें यशस्वी जयस्वालाक (3) बाद केलो. विकेटकीपर वृद्धिमान साहान ताची कॅच धरली. पयली विकेट पडल्या उपरांत मुखेली संजू सॅमसन मैदानांत देंवलो. ताणें जलद रितीन डाव मुखार व्हेलो. पावरप्लेंत 6 ओव्हरींनी 1 विकेट वगडावन राजस्थानान 55 धांवड्यो केल्यो. बटलराचें योगदान 16 आनी सॅमसनाचें 30 धांवड्यो केल्यो. अखेरेक संजू 26 बॉलांनी पांच चवके आनी 3 सक्यांचे मजतीन 47 धांवड्यो करून बाद जालो. ते उपरांत 30 बॉलांनी 28 धांवड्यांची करून देवदत्त पडिक्कल लेगीत तंबूंत परतलो.
बटलर निमाणे ओव्हरींत दोन धांवड्यो करपाच्या यत्नांत धांवबाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
