गंडभैरांवालो घोटाळो !

भांगरभूंय | प्रतिनिधी

एक अणभव – 23  

हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो. 

– लेखक

समिती सोडून दुसरे वांगडी मिटिंग करताले जाल्यार ताका पयली रेजिस्ट्रार ऑफिसाची मान्यताय लागता ती सुंदरनान  घेवंक नाशिल्ली. आनी तेवटेन साकून हे वाटेन  उडी मारिल्लो नाकशिमरो  दलभंजन फक्त सुवार्थ सोदतालो (आतां मुखार….)

सुण्या  म्हयनो सोंपून आता तीन आठवडे पासार जाल्ले.  पूण गंडभैरांवाली मस्ती उणी जावंकनाशिल्ली. सोसायटी मुखार कशी चलता ती आपुण  पळयतलोंच अशी धमकी तर ताणें वर्सुकी सभेक दिल्ली. आमचेर गाळयांचो शिंवर घालीत म्हाका आनीक पुरतोषांमाक  सोसायटींतल्यान धांवडावपाचो ताणें विडो उखलिल्लो. फुडलीं 1 तारीख लागीं येताली तशी सगळ्यांची धांवाधांव चालू जाल्ली. तीन नारीची समितीक आतां कामाक लागचें पडिल्लें. आतां तीं कितें वाटाघाटी करतात, कितें उलोवणीं करतात  हाचेर सगळ्यांचें लक्ष एकवटीत जाल्लें. थोडे वांगडी आतां ह्या तीन नारीं भितर ब्रह्मा, विष्णू आनी महेश पळोवंक  लागिल्ले.   सगळीं दारोमदार आतां मुखेली गुलगुलाताचेर आशिल्ली. तशी गुलगुलात स्वताक खूब शाणी समजताली. आपूण खंयच्या, खंयच्या कंपनींनी डायरेक्टर आसा  म्हणून  पटे मारताली. उलयतना एक वेगळोच झेत मारताली.  तिचो उलोवपाचो राग रंग म्हणजे आपुण डायरेक्टर, आपुणच  सगळें जाणा, आपुणच हुशार असो आसतालो. दुसरे सगळे आनी चड करून आमच्या पंगडातले वांगडी म्हणजे  कांय न्ही, जणू काय आमी  गड्ड्यांनी खेळत, कोंयडो बाल  खेळत  हांगा पावल्यात अशी तिच्या  मनाची अवस्था आशिल्ली. 

नारी समितीन  मिटिंगे खातीर मारिल्या  उल्याक  लोंढो भिकाजी आपुण  गांवांत ना वा अशीच फालतू  कारणां  दिवन जाता तितली फुडें धुकळटालो. निमण्या वेळार रावत जाल्यार गुलगुलात  निरुपाय  जावन आपल्या पांया कडे येतली, आपल्यो सगळ्यो मागण्यो मान्य करतली, अशें ताका दिसतालें जावये. वर्सभरांत फक्त दोन- तीन  फावट संकुलांत आयिल्लो लोंढो भिकाजी ह्या सुमानाक गंडभैरांवागेर येवन दोन-अडेज  वरांचें हितगुज करून गेल्लो. ह्या बायलांक कशी शेंडी लावप हें ताका गंडभैरांवान हे मीटिंगेंत शिकयिल्ले असो आमकांय  वास लागिल्लो. उदकांतली मांडकी उदक पियेले बगर रावना आनी हातूंत शेर्त गंडभैरांवाचो आपसुवार्थ आसुंक जाय हो आमचो दुबाव आतां पकड घेतालो.  फाटल्या वर्सभर लोंढो भिकाजीक हाताक धरून हांगा आर्थीक भानगड वा घोटाळो करतालो हो दुबाव आतां घट्ट जावंक लागिल्लो.  

तशी गुलगुलात बी तागेल्या पंगडांतली म्हण्टगेर तांचे भितर कितें कबलात जाल्या ती कळपाक आमचे कडे मार्ग नाशिल्लो.  पूण, लोंढो भिकाजीक हाताक धरून जे संदीची वाट गंडभैरांव पळयतालो, ती वेळ,  सगळ्या वांगड्याची वाट लावपाचो वेळ आता आयिल्लो. गंडभैरांवाल्या सुड घेवपाच्या राजकारणाची सुरवात हांगा जाल्ली. गंडभैरांवान जरी  लोंढो भिकाजीक एका म्हयन्याची नोटीस दिल्ली, ती आमकां दाखोवपाकूच आशिल्ली. आमच्या  वांगड्यांच्या दोळ्यांक उदक पुसपाक आशिल्ली. मागीर आमकां समजून आयिल्लें की लोंढो भिकाजींन  आपल्या सेक्युरिटी एजन्सीक ही एका म्हयन्याची नोटीस दिवूंनाशिल्ली, कित्याक तर हें कंत्राट परत आपले कडेच येवपाचें असो विश्वास ताका आशिल्लो. कशेय पद्धतीन हें कंत्राट वाढटलें आनी ताचो प्रेस कसो आनीक कितलो वाढय, आनीक कसली कलमां तातूंत घाल हें सगळे गंडभैरांवान लोंढो भिकाजीक आत्मविस्वासान शिकयिल्ले अशेंय आमकां कळिल्लें.  शेवटाक गुलगुलात आनी सुकांती हांची मिटिंग लोंढो भिकाजी कडे जावपाचो दीस आयलो. आशा भायल्या गांवांत आशिल्ली म्हणून कुशीन  उरिल्ली.  1 तारीख येवपाक आता चार दीस उरिल्ले.  सुकांतीन वेण्णाक बी हे मिटिंगेक आपयिल्लो. वेण्णान तागेली थोडी उलट तपासणी केली.  अपेक्षेप्रमाण  गुलगुलातान लोंढो भिकाजीली मखलाशी करीत, आपुण कितल्या कंपनींनी डायरेक्टर आसा म्हण सांगत,  फाटले वर्सभर देखभाल केल्ले खातीर तागेली तोखणाय करीत मीटिंगेची सुरवात केली. अपेक्षा हीच आशिल्ली, की तो पयलींच्या उंचेल्या प्रेसान थोडो  तेंप हें कंत्राट वाढयतलो, पूण भलतेच जाल्लें.  गंडभैरांवान शिकायिल्ल्या प्रमाण लोंढो  भिकाजींन  व्हडली  वाढ मागिल्ली. तीन म्हयन्याचो तागेलो मोबदलो ऍडव्हान्स दिवपाची ताणें मागणी केली म्हणजे जो वाढीव दरा प्रमाणे तेरा-चवदा लाखांचो ऍडव्हान्स, कंत्राट तोडूंक चार म्हयन्यांची नोटीस, वर्सभराची कामाची गॅरेन्टी बी मागून ताणें आपल्याले कंपनी पॉलिसी म्हणत एक शाॅक दोगूय बायलांक दिल्लो.  कंपनी पॉलिसी म्हणपी लोंढो भिकाजी कडे आपले ऑफिसय नासले आनी दुसऱ्या खंयच्याय हावसिंग सोसायटीचें काम करचो अणभवूय नासलो. ह्या संकुलांत पंढरी कुस्तार खोजने ताणें मारिल्लें. वेण्णान विचारिल्ल्या प्रश्ना वेल्यान हें समजून आयिल्लें.  लोंढो भिकाजिली कंपनी म्हळ्यार ‘अण्णाप्पागेर खांवचें, कुट्टप्पागेर जेवचें, हात मारूं मेळटा थंय लुटचें आनी गंगव्वाले बाज्जेर वचून न्हिंदचें’ असलो वेव्हार करपी एकपात्री कंपनी जावन आशिल्ली. नांव मोठे लक्षण खोटे, असो हो लोंढो भिकाजी गंडभैरांवान हांगां हाडून सोसायटी कुस्तार लूट मारपाची ताका तजवीज करून दिल्ली. आनी घडयेक स्वताचीय सोय करून घेतिल्ली.  ताणें मीटिंगेक  गुलगुलाताक मुखार सांगिल्लें की हें कंत्राट तोडल्यार  ताचेसकल  जे  कामगार आसात तांकां तो तागेल्या  दुसरे सुवातेर घालतलो. वेण्णान ताका सारको पारकिल्लो. एक तुंटोय अवचिन्न आमच्या गळ्याक गंडभैरांवांन हाडून बांदला हें समजुपाक  ताका वेळ लागलोना.   

इतलें मजगती लोंढो भिकाजीन  पंढरीक मेसेज घालून कामगाराली वळखपत्रां मागिल्ली. कंत्राट मेळिल्लो तेन्ना दोन तीन फावट सायटीचेर आयिल्लो लोंढो भिकाजी मदीं केन्नाच हांगां येवुंक नाशिल्लो, ताणें कामरा कुशींतल्यान  हाडिल्ले  कामगार केन्नाच सोडून गेल्ले आनी पंढरीन आपल्या गांवांत तोंड फाफडून हाडिल्ले कामगार  ह्या वेळार काम करताले, ह्या कामगारांक आपुन कोणा खातीर काम करतात तें पुसून खबर नाशिल्ले. ते वळखताले फक्त पंढरीक.   असल्या वेळार वळ्खपत्र मागता म्हणून ते बावडे भियेल्ले आनी फाटींफुडें जाताले. हे वटेन लोंढो भिकाजी एका  प्रतिश्ठीत पुलीस ऑफिसराचें नांव घालून धमकीवजा मॅसेजीस ह्या कामगारांक घालूंक लागिल्लो.  असल्यो नाडबुद्धी  करपाच्योय बी  लोंढो भिकाजील्या फटिंगपणाच्या कंपनीची पॉलिसी आसूंये. मदींच कोणे एका वांगड्यांन लोंढो भिकाजीक फुसलावपाक  धाकट्या सायबाक बी फ़ोन केलो, पूण देवा कडे डायरेक्ट उलोवपी मनशा कडे  तागेले संबंध आशिल्ल्यान घडयेक धाकटो  सायब  ताच्या फावरादच  उलोयलो. हे भानगडींत ताका पडचें नाशिल्लें.  

ताणें  घाल्ल्यो त्यो अटी पळोवून  गुलगुलाताक आनी सुकांतीक घाम फुटिल्लो. बशिल्ले कडे शीटा घामान पचपचीत  भिजील्लीं.  कितल्याशाच कंपनीची आपुण डायरेक्टर म्हणून बढायो मारपी  गुलगुलात हांगा वाटाघाटी करूंक नाकामयाब थारिल्ली.  तीन म्हयन्यांचें ऍडव्हान्स डायरेक्ट तागेल्या खात्यांक घालूंक हांवें, तीमण्णा, पुरतोषांम आनी कांय वांगड्यांनी साप  विरोध दाखयिल्लो. प्रचंड वाडयिल्ले  हाचें बिल, लायटीचे उदकाचे बिल कोण भरतलो  हाजेर स्पश्टताय येवुंक नाशिल्ली.  आमगेली  डायरेक्टर गुलगुलात हांगां अपेशी जाल्ली. सुकांतीक  तर  समितीचेर  येतगेर इतलें काम करचें पडटा हें आपल्याक खबर नाशिल्लें म्हणत आपलें आंग काडून घेतिल्लें. परत गोंदळ  चल्ला तें पळोवन गंडभैरांवाक आनंदाचे आताक येताले. लोंढो भिकाजी कडेन संधान सादून ताणें तागेल्यो  मागण्यो उखलून धर म्हूण सांगिल्लें. खंयचेय परिस्थितींत हें कंत्राट तुजेच कडे येवपा जाय अशें गंडभैरांव लोंढो भिकाजीक विश्वासानिशी कळयतालो.

लोंढो भिकाजीक आतां लाखाचो देड लाख जोडपाक मेळटलो हें गृहीत धरून तो ‘मुंगेरीलाल सपनां’ पळोवंक लागिल्लो. पंढरीक जावं  खंयच्याय कामगाराक कितें चलतां  हाची म्हायती नाशिल्ली.  1 तारखे नंतर तांगेलें कितें जातलें हाची चिंता तांकां आसली.  पंढरीन फोन केल्यार लोंढो भिकाजी  उत्तर दिनाशिल्लो. आतां फक्त दोन दीस उरिल्ले. आपल्याक भायरगांवांत वचपाक जाय म्हणत गुलगुलात तोंड घेवन हांगासल्ली नाच जाल्ली. हळूच तिणें कूस मारिल्ली. (फुडें चलता…)

– अजय करमली