भांगरभूंय | प्रतिनिधी
वेंचून काडिल्ली समिती तंत्रीक अडचणींत
रास्ता रोको करपाची थळाव्यांची शिटकावणी
फोंडें: धारबांदोडें आनी किर्लपाल पंचायत वाठारांत फाटल्या कांय दिसां सावन दुदसागर न्हंयेंत सोडटल्या खदूळ उदकाच्या प्रस्नाचेर उपाय काडपाक उदका स्रोत खात्याक अपेस आयलां. उदका स्रोत मंत्री सुभाष शिरोडकार हांणी वेंचून काडिल्ली समिती लेगीत तंत्रीक अडचणींत सांपडिल्ल्यान तिडकल्ल्या ग्रामस्थांनी येता त्या दोन ते तीन दिसा भितर रास्ता रोको करपाचे तयारींत आसात. खदूळ उदकाक लागून लोकांचे भलायकेक धोको निर्माण जाला.
दुदसागर न्हंयचें उदक खदूळ व्हांवत आशिल्ल्यान उदका पुरवण करपी पंप सद्या बंद दवरल्यात. फाटल्या कितल्याशाच दिसा सावन न्हंयेंतल्यान खदूळ उदक व्हांवत आशिल्ल्यान थळाव्यांनी पुलीस कागाळी लेगीत केल्यात. पूण अजून मेरेन खदूळ उदकाचो प्रस्न सोडोवपाक उदका स्रोत खात्याच्या अभियंत्यांक अपेस आयलां. ते खातीर धारबांदोडें आनी किर्लपाल पंचायत वाठारांतल्या तिडकल्ल्या लोकांनी येता त्या दोन ते तीन दिसां भितर रस्त्यार देंवपाची तयारी केल्या.
थळाव्यांच्या मतान दुदसागर न्हंयेंत व्हांवून येवपी उदक कालेंच्या आस्थापनांतल्यान सोडटात. पूण उदका स्रोत खात्याचे अभियंते मात खदूळ उदक पावसाचें आशिल्ल्याचें स्पश्टीकरण दितात. कारण पावसाचें खदूळ उदक कांय वेळांतूच नितळ जाता. पूण करमणें-किर्लपाल हांगासरले दुदसागर न्हंयेंत भरसपी कालें न्हंयचें खदूळ उदक कितलेशेच दीस नितळ जायना. ताका लागून कालें वाठारांतल्यानूच खदूळ उदक व्हांवून येत आशिल्ल्याचें ग्रामस्थांचें म्हणणें आसा.
कांय दिसा पयलीं उदका स्रोत खात्याचे मंत्री सुभाष शिरोडकार हांणी धारबांदोडें लोकांच्यो समस्या आयकून घेतिल्ल्यो. त्या वेळार खदूळ उदकाच्या प्रस्नाचेर दक्षीण गोंय जिल्हो पंचायत अध्यक्ष आनी विवीध पंचायतींच्या सरपंचांनी खदूळ उदका संबंदीं मंत्र्या कडेन उपाय काडपाची मागणी केल्ली. त्या वेळार मंत्री सुभाष शिरोडकार हांणी धारबांदोडें म्हालाचे मामलेदार हांच्या फुडारपणा खाला समितीची निवड केल्ली. समितींत धारबांदोडें, किर्लपाल आनी काले पंचायतींचे सरपंच आनी दक्षीण गोंय कार्यकारी अभियंत्याचो आस्पाव केल्लो. लोकांचे कागाळी प्रमाण खदूळ उदक कालें पंचायत वाठारांतल्या आस्थापनांतल्यान सोडटात. पूण कालें पंचायत वाठार सांगें म्हालांत येत आशिल्ल्यान तंत्रीक मुद्दो उपस्थीत जाला.
धारबांदोडें म्हालाचे मामलेदार लक्ष्मीकांत कुट्टीकार हांणी लोकांचे कागाळी प्रमाण दुदसागर न्हंयेंतल्यान व्हांवून येवपी खदूळ उदक सांगें म्हालांतल्या कालें पंचायत वाठारांतल्यान येता. ताका लागून सांगें म्हालाचे मामलेदार हांकां पत्र धाडून सरपंचाचे हाजिरेंत पळोवणी करून अहवाल उदका स्रोत खात्याचे मंत्री सुभाष शिरोडकार हांकां 31 ऑक्टोबर मेरेन धाडपाची विनंती करतले अशें सांगलें.
किर्लपाल पंचायत वाठारांत दुदसागर न्हंयचें उदक खूबशा गांवांतल्या लोकांक पंपा वरवीं पुरवण करतात. खदूळ उदकाक लागून सद्या पंप बंद दवरल्यात. तिडकल्ल्या लोकांनी केन्नाय रस्त्यार देंवपाची तयारी दाखयल्या. खदूळ उदका संबंदी पुलीस कागाळ लेगीत केल्या आनी ह्या उदकाचो प्रस्न गंभीरतायेन सोडोवपाची गरज आशिल्ल्याचें पंच वांगडी रमाकांत गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
