भांगरभूंय | प्रतिनिधी
प्रा. डॉ. कस्तुरी मोहन पैः मंगळुरूंत मनयलो कोंकणी मान्यताय दीस
भांगरभूंय । खबरां मेज
पणजीः भारत संविधानाचे आठवे वळेरेंत कोंकणी भाशेक सुवात मेळून 30 वर्सां जालीं. ही सुवात मेळोवपा खातीर खूबशा लोकांनी वावर केला, त्रास भोगल्यात. पुराय संवसारांत फक्त 25 लाख लोकांची भास आशिल्ले कोंकणीची सुवात संविधानाचे वळेरेंत आशिल्ले 25 कोटी बंगाली आनी 50 कोटी हिंदी भाशे समान आसा. आठवे वळेरेंतली सुवात फक्त सोबितकाये खातीर आसची न्हय जाल्यार तिचो आमी पुराय उपेग करपाक जाय, अशें प्रा. डॉ. कस्तुरी मोहन पै हांणी सांगलें.
मंगळुरूच्या विश्व कोंकणी केंद्रांत आयोजीत केल्ले ‘कोंकणी मान्यताय दीस’ कार्यावळींत डॉ. पै उलयताले.
गोंया सयत 90 टक्के कोंकणी भाशिकांक कोंकणी भास वाचूंक आनी बरोवपाक जमना. चार लिपयांचे वाद सोडून फक्त नागरी लिपयेंत कोंकणी बरोवपाक जाय. कर्नाटकांत कोंकणी लोकांनी 100 परस अदीक शिक्षण संस्था सुरू केल्यात आनी ते खूब बरें शिक्षण दितात. ह्या सगळ्या संस्थांनी कोंकणी शिक्षण दिवपाक सुरवात करून फुडल्या 10 वर्सां भितर 100 टक्के लोकांक कोंकणींत साक्षर करपाक जाय. जे वरी काश्मीरांत बरयिल्लें कवी कल्हणाचे संस्कृत काव्य ‘राज तरंगिणी’ कन्याकुमारी मेरेन सोंपे करून वाचपाक मेळटा, तशेंच गोंय, कर्नाटक, महाराष्ट्र आनी केरळ राज्यांत लिखीत कोंकणी सामकी गरजेची आसा. हो 30 वो कोंकणी मान्यताय दीस आमची सगळ्यांची मोख जावपाक जाय, अशें पै हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
