भांगरभूंय | प्रतिनिधी
केरी- सत्तरीः केरी सत्तरीच्या विवेकानंद स्मृती सघाच्या स्वामी विवेकानंद शिक्षण संचालीत विवेकानंद विद्या मंदिरांत पोशण म्हयनो मनयलो. केंद्र सरकार पुराय देशांत सप्टेंबर हो पोशण म्हयनो म्हूण मनयता. शाळांनी हे विशीं जागृती करचे खातीर विवीध उपक्रम चालीक लावन हो उपक्रम येयस्वी करतात. अंदूंचो हो पांचवो राष्ट्रीय पोशण म्हयनो आसा. विद्यालयांत जसो भाजी भाकरेचो उत्सवूच मनयलो.
विवीध तरांच्यो भाजयो देखीक मुळो, मेथी, आळू, वायंगी, कोबी, बटाटे, ताळखिळो, शेंगलाच्यो शेंगो, वाली, दुदयाच्या पानांची भाजी, कारोथी, शेपी, पालक, भेंडी, फ्लावर, केळीचीं बोंडां, चिटकी, दुदी, तेणली, कोंड्याचें कोंब, वालपापडी, तांबडी भाजी, गाजर, दोडगीं, शिमला मिरसांग, चुरण हांची भाजी तशेंच नासणें, गंव, जोंधळो, तांदूळ हांची भाकर आनी पोळे विद्यार्थ्यांनी घरा कडल्यान हाडले. तशेंच केळीचीं पानांय हाडलीं. सगळ्यो भाडयो, पोळे, भाकऱ्यो विद्यालयांतल्या सुमार 150 विद्यार्थ्यांक केळीच्या पानाचेर वाडल्यो. घरा कडेन भाजी खायनाशिल्ल्या भुरग्यांनी विद्यालयांत मात भूस मारली.
पालकांनी आपापल्या घरांतल्यान भाजयो करून विद्यालयांत धाडल्यो. ते उपरांत विद्यालयाची मुख्य शिक्षिका नुतन मळीक, शिक्षक वर्ग अर्जुन मधू गांवकार, अस्मिता गांवस, सुनंती झोरे, सहाय्यक समिधा गांवस, पार्वती जाधव, विद्यार्थी लक्षदीप परब, अवनीश माजीक, श्राव्या गांवस आनी साईली गाड हांणी विद्यार्थ्यांक भाजी भाकरी वाडली. ह्या वेळार नुतन मळीक हांणी विद्यार्थ्यांक राष्ट्रीय पोशण म्हयन्यां विशीं म्हायती दिली जाल्यार अर्जुन गांवकार हांणी आमचें कुडीचे वाडी खातीर भाजी कशी म्हत्वाची आसा ते विशीं म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
