भांगरभूंय | प्रतिनिधी
-भाजप फुडारी सिद्धेश नायक हांचो आरोप पणजीः नॅशनल हेराल्ड प्रकरणांत काँग्रेसीच्या फुडाऱ्यांनी आपल्याचेर आशिल्लें रीण अापणेच विकतें घेतलें. ही एके तरेची कल्पनाशक्त आशिल्ली. आतां एका कुटुंबाचें गुन्यांव लिपोवपा खातीर काँग्रेस कार्यकर्ते रस्त्यार निशेध करतात असो आरोप भाजप फुडारी सिद्धेश नायक हांणी केला. आयतारा भाजप युवा मोर्चान काँग्रेसीच्या आंदोलनाचो निशेध करून राहुल गांधी हांचो पुतळो लासलो. ह्या वेळार गिरिराज पै वर्णेकार, सिद्धार्थ कुंकळकार आनी हेर पदाधिकारी हाजीर आशिल्ले.
नॅशनल हेराल्ड प्रकरणांत काँग्रेसीच्या फुडाऱ्यांनी सुमार 2.5 कोटी रुपयांची मालमत्ता हडपली अशें नायक हांणी सांगलें. पूण आतां हेच फुडारी सज्जन जावपाचें नाटक करतात. ह्या प्रकरणांत मोर्चा काडटात. गांधी कुटुंबाक वाचवपा खातीर काँग्रेसीचे कार्यकर्ते रस्त्यार निशेध करतात. काँग्रेसीचे फुडारी आपल्या कार्यकर्त्यांचो वापर करतात आनी वापरून तांकां सोडून दितात. निशेध करपी काँग्रेस कार्यकर्त्यांनी हे विशीं विचार करपाची गरज आसा.
गांधी घराणें, काँग्रेस पक्ष, देश स्वताक आपले सामंत मानून आयल्यात अशें वेर्णेकार हांणी सांगलें. नॅशनल हेराल्ड प्रकरण हो एक व्हड मालमत्तेचो घोटाळो. हो घोटाळो 2009 वर्सा जाल्लो आनी 2012 वर्सा उक्तो जालो. तेन्ना काँग्रेस सत्तेर आशिल्ली. देखून आतां राजकी दुस्मानकायेचो आरोप करप चुकीचें. काँग्रेसीच्या फुडाऱ्यांनी गुन्यांव केल्यात जाल्यार ताची चवकशी करची पडटली. सध्या काँग्रेस पक्ष गांधी कुटुंबाक हाचे पासून वाटावपा खातीर निशेध करपाक लागला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
