भांगरभूंय | प्रतिनिधी
पणजी, प्रतिनिधी : कामाक्षी उड्डापनोव हिच्या खून प्रकरणांत पर्वरी पुलिसांनी म्हापशेंच्या प्रथमवर्ग न्यायालयांत हालींच ६०० पानांचें आरोपपत्र सादर केलां. तातूंत ५१ जाणांची साक्ष नोंद केल्या. तशेंच या प्रकरणांतलो दुबावीत फकीर उर्फ प्रकाश चुंचवाड (२२, सुकूर) हो तिच्या कुटुबीयांक तशेंच साक्षीदारांक वळखता, ताका लागून तो तांचेर चेंपण हाडपाक शकता. साक्षीदारांच्या जिवाकूय धोका निर्माण जावपाची शक्यताय आशिल्ल्याचें निरीक्षणांत नोंद केलां. उत्तर गोंय जिल्हो आनी सत्र न्यायालयान दुबावीत चुंचवाड हांणी दाखल केल्लो जामीन अर्ज भायर मारला. हे विशींचो आदेश अतिरिक्त सत्र न्या. बॉस्को रॉबर्ट हांणी दिला.
ही खुनाची घडणूक ३० सप्टेंबर २०२३ दिसा घडिल्ली. जाल्यार ३१ वेर पर्वरी पुलिसांनी दुबावीत म्हूण कामाक्षीचो आदलो मोगी फकीर उर्फ प्रकाश चुंचवाड हाका अटक केल्ली. बेपत्ता आशिल्ल्या कामाक्षीच्या चवकशे खातीर दुबावीत फकीराक पुलिसांनी ताब्यांत घेतलो तेन्ना ताणें खुनाची कबुली दिली. ते उपरांत १ ऑक्टोबराक पुलिसांनी दुबावीत निरुपडी कडकात हाका अटक केल्ली. दोगांय दुबावितांक घेवन पुलिसांनी आंबोली (महाराष्ट्र) घांटांत उडयिल्ली कामाक्षीची कूड सोदून काडिल्ली.
हे विशीं कामाक्षीचो भाव तशेंच कागाळदार अमित उड्डापनोव हांणी जामिनाक विरोध करून न्यायालयांत हस्तक्षेप अर्ज दाखल केलो. ह्या प्रकरणांत वापरिल्लो चाकू, मृतदेह तशेंच हेर पुरावे दुबाविताचे म्हायती प्रमाण जप्त केल्यात. सगळे पुरावे दुबाविता आड आसात. तशेंच कामाक्षीच्या कुटूबीयांक, तिच्या शेजार्यांक, सुरक्षा रक्षक आनी हेर साक्षीदारांक आरोपी वळखता. तशेंच सुरक्षा रक्षकाक सीसीटीव्ही फुटेज नश्ट करपा खातीर आरोप्यान लांच दिवपाचो यत्न केल्लो. तशें वळख परेडी वेळार सुरक्षा रक्षकान दुबाविताक वळखल्लो. ताका लागून दुबाविता जामीन मंजूर केल्यार साक्षीदारांच्या जिवाक धोको निर्माण जातलो, असो युक्तिवाद सरकारी वकिलान केलो. हाची दखल घेवन न्यायालयान वयलें निरीक्षण नोंद करून दुबावी फकीर उर्फ प्रकाश चुंचवाड हाचो जामीन अर्ज भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
