कला अकादमी – बांदोडकार मैदाना मेरेन प्रदर्शनांचो, कार्यावळींचो मार्ग मेकळो

भांगरभूंय | प्रतिनिधी

कार्यावळींक आक्षेप घेवपी याचिका लवादान भायरायली

पणजी : मांडवी न्हंय कुशीक कला अकादमी ते बांदोडकार मैदाना मेरेन भरपी प्रदर्शनां तशेंच हेर कार्यावळी चालूच दवरपाचो मार्ग हरीत लवादान याचिका भायरायिल्ल्यान मेकळो जाला. लोकोत्सव, व्हायन फेस्टिव्हल तशेंच प्रदर्शनांचेर बंदी घालची अशी याचिका हरीत लवादा मुखार आशिल्ली. लवादान ही याचिका भायरायल्या.

कला अकादमी ते बांदोडकार मैदाना मेरेन बऱ्योच कार्यावळी जातात. इफ्फी वेळार मांडवी न्हंय कुशीक स्टॉलां आसतात. ह्याच वाठारांत अश्टमीची फेरी तशेंच चवथीचो बाजार भरता. हो वाठार सीआरझॅड खाला येता. प्रदर्शनां तशेंच हेर कार्यावळींक लागून सीआरझॅड नेमाचें उल्लंघन जाता. ह्या कार्यावळींक प्रतिबंद करचें अशी मागणी याचिकेंत आशिल्ली. हो वाठार सीआरझॅड खाला येत आसलो तरी कार्यावळींक लागून सीआरझॅड कायद्याचें उल्लंघन जायना. हाका लागून हे कार्यावळींक आमी आक्षेप घेवंक शकनात अशें राष्ट्रीय हरीत लवादान आदेशांत म्हणलां.

राष्ट्रीय हरीत लवादाचे अध्यक्ष आदर्श कुमार गोएल, न्यायालयीन वांगडी न्यायाधीश सुधीर अगरवाल, न्यायालयीन वांगडी सुधीरकुमार सिंग, तज्ञ वांगडी प्रो. ए. सेंथील वेल, तज्ञ वांगडी डॉ. विजय कुलकर्णी हांणी हो आदेश दिला.

कला अकादमी ते बांदोडकार मैदाना मेरेनचो वाठार सीआरझॅड 11 मदीं येता. बांदोडकार मैदानाचेर पयलीं सावन फुटबॉल मॅची जातात. सीआरझॅड 11 वाठारांत कार्यावळी आयोजीत करपाक मान्यताय आसा. प्रदर्शनां तशेंच हेर वेवसायीक कार्यावळींक लागून सीआरझॅड कायद्याचें उल्लंघन जायना, अशें प्रतिज्ञापत्र गोंय दर्यादेग वेवस्थापन प्राधिकरणान दाखल केल्लें. हे विशीं राष्ट्रीय हरीत लवादान 22 जुलय 2016 तारखेक एक आदेश दिल्लो. ह्या आदेशाचें लेगीत उल्लंघन जायना, अशें लवादान स्पश्ट केलां.

कला अकादमी भायर पयली लोकोत्सव जातालो. लोकोत्सवांत शेंकड्यांनी स्टॉलां आसतालीं. ते भायर कपडे तशेंच कला कुसरीच्या वस्तुंची प्रदर्शनां भरतात. कांय वर्सां पयलीं बांदोडकार मैदानाचेर व्हायन फेस्टिव्हल जाल्लें. ह्या सगल्या कार्यावळींक याचिकेंत आक्षेप आशिल्लो. ह्या सगल्या कार्यावळींक लागून सरकार तशेंच म्हापालिकेक शुल्काची येणावळ मेळटा. ते भायर कांय वेवसायिकांक वेवसायाची संद उपलब्ध जाता.