भांगरभूंय | प्रतिनिधी
हळदोण्यां घडलो प्रकार; एसबीआयचें पांच लाखाचें लुकसाण
म्हापशें: हळदोण्यां एसबीआय बँकेचें एटीएम मशीन उक्तें जायनाशिल्ल्यान फातर घालून ताचें लुकसाण केलां. हाका लागून बँकेचें सुमार पांच लाख रुपयांचें लुकसाण जालां. ह्या प्रकरणांत म्हापशें पुलिसांनी अनवळख्या आड अदखलपात्र गुन्यांव नोंद केला.
हो प्रकार शुक्रारा सकाळीं 10 वरांच्या सुमाराक उक्ताडार आयलो. भारतीय स्टेट बँकेच्या ह्या एटीएमांत एक गिरायक गेलो. ताका एटीएम मशीन फोडिल्ल्याचें नदरेक आयलें. ताणें रोखडेंच हो प्रकार बँक कर्मचाऱ्यांच्या कानार घालो. बँक वेवस्थापक आनी कर्मचाऱ्यांनी रोखडीच एटीएमा कडेन धांव घेवन पळोवणी केली.
हें मशीन उक्तें करून ताचेर तशेंच मशिनाचे स्क्रिनीचेर व्हड फातर घाल्लो. हो फातर लेगीत घडणूक थळार आशिल्लो. चोरी करपाचे नदरेन हो यत्न केल्ल्याचें दिसून येता.
उपरांत हे विशींची म्हायती म्हापशें पुलिसांक दिली. पुलिसांनी घडणूक थळार धांव घेवन पळोवणी केली आनी पंचनामो केलो. एटीएमाच्या सीसीटीव्हीत एक तरणाटो भितर सरता आनी एटीएम मशीन उक्तें करपाचो यत्न करता. ते उक्तें जायनाशिल्ल्याचें पळोवन भायल्यान व्हड फातर हाडटा आनी तो मशिनाचे स्क्रिनीर आनी मशिनार मारत आशिल्ल्याचो प्रकार फुटेजींत बंदिस्त जाला. फातर घालून लेगीत मशीन उक्तें जायनाशिल्ल्याचें पळोवन दुबावीत आरोपी थंय सावन परतून वता. हाका लागून मशिनांतले पयशे ताका चोरूंक मेळ्ळे नात.
ह्या प्रकरणांत बँक वेवस्थापक ए. दिवाकर राव हांणी पुलिशेंत कागाळ केल्या. कागाळींत बँकेचे सुमार पांच लाख रुपयांचें लुकसाण जाल्ल्यांचें तांणी नमूद केलां. ह्या कागाळीच्या आदारान पुलिसांनी अनवळख्यां आड अदखलपात्र गुन्यांव नोंद केला. सीसीटीव्ही फुटेजीच्या आदारान पुलीस दुबाविताचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
